Siglir tar il cuntegn

Header

video
Sommaruga: «Occurenzas grondas be sut cundiziuns severas»
Or da News-Clip dals 12.08.2020.
laschar ir
cuntegn

Cussegl federal infurmescha Occurrenzas grondas puspè lubidas a partir da l'october

A partir da l'october èn occurrenzas grondas puspè lubidas – quai dentant sut cundiziuns fitg severas. E talas occurrenzas dovran la lubientscha dal chantun. Quai ha decis il Cussegl federal.

Las decisiuns curt e cumpact:

  • La regla dad occurrenzas cun maximalmain 1'000 persunas scroda l'october.
  • Per occurrenzas grondas valan cundiziuns fitg severas. Ed ellas ston vegnir lubidas dals chantuns.
  • L'obligatori da mascrinas vegn extendì sin il traffic aviatic.
  • Il traffic public duai vegnir sustegnì cun 700 milliuns francs.

A partir da l'october èn manifestaziuns grondas cun passa 1'000 persunas puspè lubidas en Svizra. Quai ha il Cussegl federal decidì oz, mesemna. Per quellas valan dentant cundiziuns severas ed ellas basegnan ina lubientscha dals chantuns. Las proximas duas emnas vul la Confederaziun elavurar ensemen cun ils chantuns ils criteris per manifestaziuns grondas.

Per lubir in'occurrenza gronda ston ils chantuns resguardar lur atgna situaziun epidemiologica sco er lur capacitads da contact tracing. Uschia vul il Cussegl federal segirar che la situaziun da corona na daventia betg mendra en Svizra. Cun questa avertura precauta vul el resguardar ils basegns da la societad ed ils interess economics dals clubs da sport e da las manifestaziuns culturalas. Ils chantuns percunter avessan preferì ina schluccada pir en in pèr mais.

Betg tut las occurrenzas grondas èn in ristg

Il Cussegl federal ha dentant argumentà che betg tut las occurrenzas grondas hajan ils medems ristgs. I dettia er manifestaziuns grondas, nua ch'i saja pussaivel da tegnair en ina distanza minimala.

Il scumond dad occurrenzas grondas è vegnì introducì ils 28 da favrer 2020 per reducir las infecziuns cun il coronavirus. Previs era quest scumond fin la fin d'avust. Cun la decisiun dal Cussegl federal dad oz, vegn quel pia prolungà fin ils 30 da settember. Cun questa prolungaziun vul il Cussegl federal garantir ch'ils chantuns èn lura propi pronts per talas occurrenzas.

video
Berset: «Nus duvrain temp per far las preparaziuns»
Or da News-Clip dals 12.08.2020.
laschar ir

Purtar mascrinas er en aviuns

Ultra da quai ha il Cussegl federal er infurmà davart l'obligatori da mascrinas en aviuns. A partir dals 15 d'avust vala in tal obligatori per tut ils aviuns da lingia e da charter che sa platgan en u partan davent da la Svizra.

Sustegn per traffic public

Cun 700 milliuns francs vul il Cussegl federal minimar las perditas che las interpresas da traffic public e da traffic da vitgira sin rodaglias han fatg pervi da la crisa da corona. Il Cussegl federal ha fatg pront la missiva per il parlament.

video
Occurrenzas grondas duain puspè esser pussaivlas a partir da l'october
Or da sil punct dals 12.08.2020.
laschar ir

A la conferenza da medias dal Cussegl federal davart las novas decisiuns en connex cun il coronavirus han infurmà:

  • Simonetta Sommaruga, presidenta da la Confederaziun e scheffa dal Departament federal per ambient, traffic, energia e communicaziun
  • Alain Berset, schef dal Depaterment federal da l'intern
  • Guy Parmelin, schef dal Departament federal d'economia, furmaziun e retschertga

RTR novitads 15:00

Artitgels legids il pli savens

Scrollar a sanestra Scrollar a dretga