Siglir tar il cuntegn

Header

video
Emprima bilantscha areguard la strategia da far tests
Or da Telesguard dals 31.03.2021.
laschar ir
cuntegn

Coronavirus Strategia da testar en il Grischun funcziuna

Suenter che la strategia da testar en il Grischun è dapi dus mais en vigur, fa il chantun il facit che quella strategia mussia effect. Il dumber da cas da corona en Grischun saja sin in nivel constant. Cumpareglià cun ils auters chantuns haja il Grischun la segund bassa cifra tar l'incidenza da 7 dis e tar la valur R. Uschiglio creschian las cifras praticamain dapertut. Als tests regulars sa participeschian passa 35% da la populaziun regularmain.

Populaziun fa regularmain tests

Dapi il favrer sa participeschan passa 1'500 interpresas e circa 50'000 collavuraturas e collavuraturs als tests en manaschis. Plinavant sa laschan passa 21'900 scolaras e scolars, persunas d'instrucziun sco er collavuraturas e collavuraturs da 144 scolas popularas e scolas medias testar voluntarmain. Dapi ch'i vegn testà repetidamain en manaschis ed en scolas n'hai dà naginas erupziuns.

Blers tests - datti er insacura schluccadas?

Sper tegnair sut controlla las cifras da corona duessan ils tests er avair l'effect d'insacura puspè pussibilitar dapli. Tenor il manader dal stab directiv chantunal, Martin Bühler saja quai pir pussaivel cura ch'er auters chantuns augmentian lur effort da tests e che quels mussian er là effect. Il Grischun è dentant persvadì d'esser sin la dretga via, uschia possian ins dar in zic segirtad a manaschis, scolas e las singulas persunas.

audio
Emprim fazit da strategia da testar en Grischun
03:30 min, Actualitad dals 31.03.2021.
laschar ir. Durada: 03:30 minutas.

Grazia als tests pudì laschà avert territoris da skis

Grazia als tests preventivs han ins pudì evitar ulteriuras mesiras rigurusas e per exempel er pudì laschar avert senza interrupziun ils territoris da skis. Tenor calculaziuns dal Forum economic dal Grischun avessi custà supplementarmain 320 milliuns francs svizzers, sch'ins avess stuì serrar ils territoris da skis.

Effect han era ils tests da pilot en las regiuns Bernina, Engiadina Bassa/Val Müstair e Malögia gì. En questas regiuns ferm pertutgadas dal coronavirus han ins pudì reducir zunt fitg tant ils dumbers da cas sco er la rata da mortalitad.

Ord l'archiv

Tests da corona da massa - project dal chantun Grischun.

RTR novitads 11:00

Artitgels legids il pli savens

Scrollar a sanestra Scrollar a dretga