Siglir tar il cuntegn

Header

Purtret d'ina mamma ed in uffant che stattan ensemen en cuschina ed èn vid cuschinar ensemen.
Legenda: Keystone
cuntegn

Dretgira chantunala Persunas ch'educheschan sulettas vegnan avantagiadas

Persunas ch’educheschan sulettas vegnan favurisadas memia fitg tar la taglia en il Grischun. A questa conclusiun vegn la Dretgira administrativa dal chantun. Percunter na dettia nagina discriminaziun da pèrs maridads tar la taglia chantunala e communala, dentant tar la taglia federala.

Concret ha la Dretgira administrativa gì da tractar in cas da puniziun tar la maridaglia. La conclusiun: las mesiras ch’il chantun ha per evitar ina puniziun tar la taglia funcziunan. Tar la taglia federala dettia dentant in problem; là na saja la dretgira grischuna dentant betg responsabla.

Cuntradicziun a la constituziun chantunala

Ina cuntradicziun a la constituziun chantunala vesa la dretgira tar la distgargia da taglia per persunas ch'educheschan sulettas. Famiglias cun in genitur, possian far diever dal principi da splitting parzial (qua vegn la paja partida entras 1,9). Quai chaschunia ch'ina persuna suletta cun in uffant sto pajar tuttina blera taglia sco in pèr maridà cun in uffant. Quai che munta in avantatg fiscal per in genitur sulet.

La prestaziun economica d'ina persuna ch'educhescha suletta in uffant, è dentant pli auta che tar in pèr maridà cun in uffant. Perquai vegnia il principi da far pajar taglia tenor quella prestaziun blessà.

La dretgira scriva vinavant, ch'ins possia dir en general, ch'ina persuna ch'educhescha suletta in uffant haja dapli expensas ch'ina persuna suletta senza uffants, dentant haja ina tala persuna er pli paucas extradas ch'in pèr maridà cun in uffant. Sch'il chantun veglia adattar questa regla, saja quest fatg da resguardar.

RTR novitads 17:00