Siglir tar il cuntegn

Header

audio
Scolars da l'exteriur en moda tar las scolas medias grischunas
Or da Actualitad dals 01.09.2020.
laschar ir. Durada: 03:48 minutas.
cuntegn

Dumber da scolars Scolars da l'exteriur en moda tar las scolas medias

L'onn da scola ha entschet. E per la scolas medias dal Grischun èsi decisiv quant blers scolars novs ch'èn vegnids vitiers. Quai inditgescha numnadamain sche la scola sto rumper la testa per il futur u betg. Pervia da la midada demografica n'è il svilup betg dapertut tuttina.

Pli paucas famiglias, pli paucas naschientschas e pli paucs uffants. La midada demografica è per las scolas medias en il Grischun in problem bain enconuschent. Dentant han tschertas scolas medias en il Grischun chattà ina soluziun cun recrutar dapli scolars interns.

La midada demografica è omnipreschenta

L’Institut otalpin a Ftan ha quest onn totalmain circa 10% pli pauc scolaras e scolars cumpareglià cun l’onn passà. Il rectur Beat Sommer declera ch’enturn in terz pli paucs scolars indigens sajan s’annunziads, cumpareglià cun l’onn avant. La midada demografica en l’Engiadina bassa saja ferma. Ord vista economica na saja quai betg nausch. Grazia a las relaziuns internaziunalas ha la scola pudì carmalar 13 scolars novs che stattan en l’internat.

La scola media da l’Academia Engiadina a Samedan ha quest onn cun 212 scolaras e scolars, circa 12% pli paucs cumpareglià cun ils onns avant (2019: 241 / 2018: 238). Tenor la responsabla da marketing e communicaziun Cilgia Giovanoli ha quai medemamain da far cun la midada demografica. Quai sajan dentant fluctuaziuns normalas ch’els enconuschian – e che sa midian mintg’onn.

Las citads economicamain fermas gidan

Tar scolas medias ch’èn situadas pli datiers da centers, n’è la midada demografica betg da sentir ferm. Il rectur Philippe Benguerel da la Scola chantunala a Cuira di, ch’il dumber da scolars saja creschì levamain cumpareglià cun l’onn avant. Il motiv persuenter saja che la populaziun da Cuira creschia medemamain mintg’onn.

Era la Scola media a Tavau preschenta in dumber d’uffants constant. Tenor il rectur Severin Gerber ha la scola enturn 200 scolaras e scolars. Quest cifra aveva la scola era gia en il passà.

La Scola media evangelica a Schiers ha augmentà il dumber da scolars per enturn 5% sin 390 scolars.

Scolars en l’internat sco schanza

Scolas ch’han dapli scolars interns ch'externs han pudì profitar. Il Lyceum Alpinum a Zuoz ha quest onn circa 15 fin 20 scolars dapli. Tenor il rectur Christoph Wittmer han ins anc il mars ed avrigl gì quitads, che blers scolars mancan u na pon betg vegnir en Svizra causa cunfins serrads. Fertant è la situaziun sa meglierada e las annunzias èn anc arrivadas baud avunda.

Era il Gimnasi da sport a Tavau viva per buna part da students interns. Dapi onns èn las capacitads da la scola al limit, cunzunt per scolars interns. Uschia saja grev da prender si anc dapli scolars, di il rectur Urs Winkler. Là è la cifra restada constanta cun circa 155 scolars.

RTR actualitad 07:00

Artitgels legids il pli savens

Scrollar a sanestra Scrollar a dretga