Siglir tar il cuntegn

Header

Navigaziun

cuntegn

Ecologia Stivletta «Val Verda» – chalzer bass «Ivraina»

Chalzers cun nums rumantschs e fatgs da pel-tscharva dal Grischun – quai pon ins cumprar en la stizun Cervo Volante a Turitg.

Design classic

Il design ha procurà ina da las fundaturas ch’è professuressa per design. Ella ha concepì models classics che n’èn betg suttaposts a la moda e pon vegnir purtads ditg.

Il pli gugent avess Cervo Volante laschà cuser ils chalzers en Svizra – era per spargnar lungs viadis da transports che na sa cumportan betg cun l’idea d’ina producziun persistenta. Ma en Svizra na datti nagins chalgers pli che pudessan fabritgar in’entira collecziun.

Chalger da num e pum

Cun Silvano Sassetti ha Cervo Volante la finala chattà en l’Italia in chalger da num e pum che producescha era per marcas renumadas sco Dior. Aposta per ils chalzers-tscharva ecologics sto Sassetti drizzar auter sias maschinas. Pertge ils chalzers èn fatgs entiramain da tgirom e vegnan cusids cun in spezial fil ecologic.

In brav pretsch

In chalzer fabritgà entir ed entratg a moda ecologica ha ses pretsch. Tgi che less cumprar in chalzer da Cervo Volante sto pajar tranter 400 fin 800 francs.

Cervo Volante venda ses products perquai en lieus ch’i dat clientella bainstanta. Sper la stizun al Neumarkt datti fatschentas a San Murezzan, Flem ed a Berna che vendan il chalzer ecologic cun num rumantsch.

Nums da chalzers quasi poetics

Personen-Box aufklappenPersonen-Box zuklappen

Ils chalzers portan oravant tut nums locals sco Pardiel, Ivraina, Curaglia, God Grisch, Val Flin Planira. I saja ils lieus nua ch’ins haja sajettà las tscharvas da las qualas ins haja fatg il tgirom per ils chalzers, di Conny Thiel.

Ils nums van a prà cun ils models. In chalzer fin da festa per umens ha num Tamangur. In chalzer bass da curegia porta il num Citadin. In stival lung per damas ha num Pardiel.

RR actualitad 11:00