Siglir tar il cuntegn

Header

audio
Bilantscha stad d'alp 2020
Or da Actualitad dals 22.09.2020.
laschar ir. Durada: 03:17 minutas.
cuntegn

Economia d'alp En general buna bilantscha da la stad

100'000 animals van mintga stad ad alp en il Grischun. 1'500 persunas han lavur en connex cun las alps ed i vegn producì 11'000 tonnas latg. La stagiun d’alp 2020 saja stada buna, di il chantun, surtut cumpareglià cun l’onn precedent. Era sche corona haja giugà ina rolla.

La stad d’alp 2020 saja tut en tut stada ina buna stad, di Töni Gujan, cussegliader d’economia d’alp dal chantun. Ina punct che ha chaschunà per gronds fastidis èn ils lufs. Enfin 40 lufs vivan en il Grischun.

Nus avain propi gì bunamain mintga di in’annunzia, surtut la biestga manidla era pertutgada. Quai è per nus zunt inquietant. Nus na savain betg propi co vinavant. Uss stuain nus spetgar giu il process politic.
Autur: Töni Gujancussegliader d'economia d'alp dal chantun

In aspect positiv è dentant l’aura stada. Suenter in enviern zunt miaivel cun avunda naiv hai dà ina stad cun bler sulegl e tuttina betg memia pauca plievgia.

Naginas cifras concretas

Malgrà che las cifras n’èn betg anc avant maun quinta il chantun cun ina producziun da latg e charn en media. Cunquai ch’i dat en il Grischun adina dapli vatgas mamma e pli paucas vatgas da latg pudessi dar en il futur pli pauc chaschiel d’alp.

Influenza da corona

L’entschatta n’èsi betg stà cler, sch’ils lavurers e las lavureras da l’exteriur possian vegnir en Svizra. Quai che fiss stà catastrofal, la fin finala è bun in terz dals lavurers d’alp da l’exteriur. Cun agid dal chantun saja quai lura reussì da laschar vegnir l’agid. Tar las stgargiadas ha corona dentant fatg in stritg tras il quint. Grondas stgargiadas èn vegnidas dadas giu u redimensiunadas, ustaria e festa n’hai savens betg dà.

RTR actualitad 08:00

Artitgels legids il pli savens

Scrollar a sanestra Scrollar a dretga