En Svizra datti mintga di terratrembels

En Svizra trembla la terra mintga onn 500-800 giadas. Pia, en media datti tar nus mintga di 2 terratrembels. Nus na sentin dentant betg tut ils terratrembels.

Laschar ir video «Terratrembels en il Grischun»

Terratrembels en il Grischun

4:05 min, Telesguard dals 14.11.2016

Mintg’onn datti en Svizra 10 fin 15 terratrembels ch’èn da sentir. Michele Marti dal servetsch seismologic Svizzer di, ch’ins sentia in terratrembels, circa davent d’ina fermezza da 2.5 sin la scala da Richter. I saja dentant da guardar sin divers facturs. La notg senti'ins in terratrembel meglier che durant il di.

En il Grischun hai dà ils 7 d’october il davos terratrembel, che saja stads da sentir. Quel veva ina fermezza da 3.9, ed è stads da sentir quasi en l'entir Grischun. Donns hai dentant dà nagins.

Grischun è ina regiun periclitada

Da principi schai l’entira Svizra sin territori da terratrembel. Tschertas regiuns, sco il Vallais, Basilea ed era il Grischun èn dentant spezialmain periclitadas. En questas regiuns datti era ils pli blers terratrembels.

Sco Michele Marti dil servetsch seismologic di, stoppia ins quintar en Svizra mintga 50-150 onns cun in terratrembel ferm. Quai munta: cun la fermezza 6 sin la scala da Richter. Il davos uschè ferm terratrembel hai dà en Svizra en ils onns 40 en il Vallais. I aveva dà gronds donns vid edifizis e trais persunas eran mortas.