Dapi mesemna èn radund 13'000 fugitivs sin l'insla Lesbos senza suttetg - dapi ch'il champ da fugitvs Moria è ars. Entant che l'Uniun europeica è anc en discussiuns, quants fugitivs da prender si, vul il Cussegl federal prender si 20 dals radund 400 uffants e giuvenils betg accumpagnads. Quai cun far part a l'agid che la Germania e la Frantscha hajan inizià. En il center stettia però l'agid al lieu cun trametter rauba d'agid sco satgs e mattas da durmir, canisters cun aua, utensils da cuschina ed auter pli.
En vista als total 13'000 fugitivs ch'èn ussa senza suttetg avevan pliras citads e chantuns en Svizra offrì da prender si dapli fugitivs. Uschia era il Grischun, nua ch'il cusseglier guvernativ Peter Peyer (PS) n'è betg cuntent cun ils plans da la Confederaziun. El aveva communitgà ch'il Grischun pudessia prender si 20 famiglias – pia radund 100 persunas.
Las capacitads èn avant maun en Svizra, cunquai ch'ils cunfins èn stads serrads durant il temp da corona, uschia che damain fugitivs sajan entrads.
Igl è impurtant che las citads ed ils chantuns fan ussa squitsch sin la Confederaziun, ch'i na va betg da far ussa mesiras d'agid minimalas.
La Confederaziun para però da franar quest'iniziativa. La cussegliera federala Karin Keller-Sutter ha puntuà che la Confederaziun haja la cumpetenza da lubir a fugitivs d'immigrar, e betg ils chantuns.