Siglir tar il cuntegn

Header

video
RTR ha mess gastronomia e politica vi d'ina maisa
Or da Giuventetgna dals 07.01.2021.
laschar ir. Durada: 26 minutas 12 Secundas.
cuntegn

Gastronomia vs. politica RTR ha mess gastronomia e politica vi d'ina maisa

RTR ha mess gastronomia e politica vi d'ina maisa – vi d'ina maisa en in'ustaria vida e fraida – perquai er las giaccas grossas. Annalisa Giger ha gì la chaschun da prender en la zanga il minister d'economia Marcus Caduff. Ella ha pudì tschentar ad el tut las dumondas ch'èn s'emplunadas ils davos mais tar la gastronomia. Cunzunt la dumonda, cura ch'ils daners da sustegn vegnan, fatschenta la branscha. La discussiun pudais tadlar qua sut:

audio
Corona ed ustarias: Marcus Caduff ed Annalisa Giger da GastroSuisse
ord Actualitad dals 07.01.2021.
laschar ir. Durada: 15 minutas 11 Secundas.

Il ductus dal Cussegl federal è cler: Las cifras èn anc adina sin in aut nivel ed uschia ston las mesiras actualas vegnir prolungadas – enfin la fin favrer. Actualmain è quest plan en consultaziun tar ils chantuns. Ils 13 da schaner decida il cussegl federal lura definitivamain.

La gastronomia patescha vinavant

Sche las mesiras actualas vegnan prolungadas, lura vul quai era dir che las ustarias restan vinavant serradas. Per la suprastanta da Gastro Suisse, Annalisa Giger, è quai ina decisiun sgarschaivla. Puspè tutgian las mesiras fermamain la gastronomia.

Nus ans dumandain adina puspè: Daco? Pertge puspè nus?
Autur: Annalisa Giger Gastro Suisse

Annalisa Giger declera che la societad da gastronomia dal Grischun cuntinuescha da far vinavant squitsch sin il chantun ed a la Confederaziun – cunzunt puncto agid finanzial. Mo cun annunziar lavur curta restian las ustarias betg liquidas. Els han da basegn sustegn finanzial supplementar, cunquai ch’il culm da custs fixs creschia vinavant.

audio
Gastronomia serrada 5 emnas pli ditg – reacziuns
ord Actualitad dals 06.01.2021.
laschar ir. Durada: 2 minutas 23 Secundas.

Vacanzas da sport

Las entradas grazia las vacanzas da skis il favrer sajan fitg impurtantas per la gastronomia. Gist durant quest temp vegnian blers giasts da la Bassa. Quella speranza da pudair almain qua tras gulivar ina part da la sperdita gronda è morta. Sch’il cussegl federal prolunghescha las mesiras, lura vegnian las ustarias en tut ad esser serradas durant 3 mais.

RTR actualitad 17:00

Artitgels legids il pli savens