Siglir tar il cuntegn

Header

video
Ina decisiun ed ina proposta dal Cussegl federal
Or da Telesguard dals 06.01.2021.
laschar ir
cuntegn

Mesiras da corona Cussegl federal vul prolungar mesiras fin la fin da favrer

audio
Il Cussegl federal vul prolungar las mesiras
02:05 min, Actualitad dals 06.01.2021.
laschar ir. Durada: 02:05 minutas.

Il Cussegl federal propona il suandant als chantuns:

  • Ustarias, manaschis culturals, implants da sport ed indrizs da temp liber duain restar serrads fin la fin favrer – pia per 5 emnas dapli.
  • Il Cussegl federal propona mesiras pli strictas als chantuns: Quellas pertutgan tranter auter in obligatori da far homeoffice, da serrar stizuns, ulteriuras restricziuns per gruppas da persunas.
  • Suenter ina consultaziun tar ils chantuns, vul il Cussegl federal decider ils 13 da schaner.
  • Decidì gia uss ha il Cussegl federal – ch'i na dat naginas excepziuns pli per chantuns cun meglras cifras da corona. Per l'entira Svizra valan las medemas reglas. Quai vala davent dals 9 da schaner.
video
«I va anc mais fin ch'ins vesa l'effect dal vaccin» (franz.)
Or da News-Clip dals 06.01.2021.
laschar ir

Las cifras da corona actualas na mussian betg a moda correcta la situaziun epidemiologica, scriva il Cussegl federal en ina communicaziun. Uschia sajan las cifras bain sa sbassadas durant ils ultims dis, dentant hajan ins fatg pli paucs tests. Plinavant saja er la nova varianta da corona in privel per puspè pegiurar la situaziun. Il dumber d'infecziuns, las hospitalisaziuns ed er ils mortoris sco er il squitsch sin il persunal da sanadad sajan vinavant fitg auts.

Proponì prolungaziun per 5 emnas

Gia oz saja previsibel che las cifras da corona na vegnian betg a sa sbassar durant las proximas emnas. Perquai è il Cussegl federal da l'avis che las mesiras decididas ils 18 da december èn da prolungar sur ils 22 da schaner ora. El propona ch'ustarias, manaschis culturals, implants da sport ed indrizs da temp liber duain restar serrads enfin la fin da favrer. Uschia duai surtut er dar segirezza da planisar per il persunal pertutgà.

video
Berset: «Nus essan sin in nivel fitg aut»
Or da News-Clip dals 06.01.2021.
laschar ir

Rinforzament da mesiras en consultaziun tar ils chantuns

Plinavant ha il Cussegl federal dà en consultaziun ulteriuras mesiras pussaivlas, per pudair reagir pli svelt, sche necessari. Questas mesiras pertutgan in obligatori da homeoffice, da serrar stizuns betg essenzialas, ulteriuras restricziuns per inscunters ed occurrenzas privatas, l'augment da segirezza per persunas spezialmain periclitadas sco er ulteriuras mesiras a las plazzas da lavur. Plinavant duain ils chantuns er ponderar tge mesiras che duain esser pussaivlas en scolas – en cas ch'ulteriuras mesiras na sajan betg d'evitar.

Medemas reglas en l'entira Svizra

Plinavant ha il Cussegl federal decidì ch'i duai dar las medemas reglas da basa per l'entira Svizra. Ils chantuns na duain betg pli avair la pussaivladad per excepziuns sch'i han cifras bassas. Uschia vul il Cussegl federal evitar turissem da cumpra e da gastronomia tranter ils chantuns, ed er augmentar l'acceptanza per las mesiras. Questa decisiun va en vigur ils 9 da schaner.

Terrassas en territoris da skis

Quai muntass en sasez che las terrassas en il territoris da skis ston puspè serrar. Quai è ina schluccada che la regenza grischuna ha decis. La regenza grischuna è dentant vid examinar pussaivladads per pudair salvar questa schluccada e laschar avert las terrassas en ils territoris da skis. Quai ha il cusseglier guvernativ dal Grischun, Marcus Caduff confermà ad RTR.

RTR novitads 15:00

Artitgels legids il pli savens

Scrollar a sanestra Scrollar a dretga