Tgi na fa betg gugent termagls? Ozendi èsi da constatar ch'il dar gieus electronics n'è betg mo in trend, mabain che quai è daventà ina part da l'economia. I dat «gamers» professiunals, e tals che dattan ils gieus per sa distrair.
Gaming – in fenomen surtut giuven-masculin
Bun 70% da las giuvnas e dals giuvens han inditgà da dar gieus, en il rom dal studi «JAMES» da la Scola auta turitgaisa per scienzas applitgadas (ZHAW). Entant ch'igl è tar ils mats enturn 90% ch'inditgeschan da dar gieus, èsi tar las mattas bun la mesadad. Las mattas èn persuenter pli preschentas en las medias socialas. La durada en media ch'i giogan inditgeschan els en media cun radund in'ura ils lavurdis – e las fins d'emna radund duas uras. Ina cifra ch'è restada pli u main stabila. Era qua èsi tar ils mats dapli: Mats giogan almain dubel uschè bler sco las mattas.
Il trend che las quaidas da dar gieus tschessa cun la vegliadetgna, è era sa mussà tar il studi actual dal 2020. Stgars la mesadad da tuts e tuttas fan gieus ch'ins gioga persul. Bun in terz però gioga regularmain online ensemen cun auters. E ch'i cumprian assets en gieus u in season-pass inditgeschan sulettamain 3 pertschient.
Experientschas custaivlas u privlusas?
Tranter pedagogs da medias è cler ch'il gaming po avair effects positivs, però era varts umbrivaunas. Entant che mats e mattas pon cun tals gieus emprender da furmar strategias creativas, trenar la memoria e socialisar cun persunas sin l'entir mund, èn era ils ristgs avant maun – sco per exempel la fugia da la realitad, dependenza, perdita da daners e cybermobbing.
Uschia cusseglia il pedagog da medias, Giusep Carigiet, era da tematisar il gaming cun ils uffants a chasa. Ins stoppia esser e restar attent, infurmar e cussegliar. I giaja per realisar uschè baud sco pussaivel eventuals signals sco per exempel consum nuncontrollà, ubain sintoms da mancanza, sch'ins è offline. E silsuenter tematisar.
