Chantun - GrFlex: Spargnar flexibel – e dernière da la ministra da finanzas - Novitads

Chantun GrFlex: Spargnar flexibel – e dernière da la ministra da finanzas

GrFlex è il num dal recept da la ministra da finanzas partenta, Barbara Janom Steiner, per pudair reagir spert, sche las finanzas chantunalas vegnan sut squitsch en avegnir. La regenza ha communitgà, ch’ella tramettia en consultaziun la revisiun da las leschas pertutgadas.

Autur: CDM / Isabelle Jaeger

Per pudair reagir en avegnir sch’ils raps vegnan stgars vul la regenza savair reagir spert. Quai vul dir concret: Cun ina revisiun da lescha duajan vegnir schluccadas las obligaziuns d'expensas per ch'il Cussegl grond haja dapli libertads d'agir. La regenza ha uss tramess en consultaziun il pachet da mesiras «GrFlex» che duai pussibilitar quai en avegnir.

audio

Mezdi: GrFlex va en consultaziun

ord Actualitad dals 19.12.2018.

laschar ir. Durada: 1 minuta 3 Secundas.

GrFlex stettia sut il motto «gouverner c'est prévoir» fa a savair la regenza in sia communicaziun. In quel segn sajan da chapir las mesiras sco «politica da finanzas activa e prospectiva» che duai tegnair las finanzas chantunalas en equiliber er a lunga vista – u cun auters pleds sco ultim grond project da la ministra da finanzas partenta, da Barbara Janom Steiner.

La fasas da consultaziun dura fin ils 31 da mars 2019. Las reacziuns vegnan lura evaluadas dal successur da Barbara Janom Steiner (PBD), dal nov minister da finanzas Christian Rathgeb (PLD ed actualmain schef dal departament da giustia, segirezza e sanadad).

Da GrFlex sajan pertutgadas 14 leschas chantunalas, scriva la regenza.

Quellas duajan vegnir revedidas cun la finamira da schluccar u d'abolir dal tuttafatg obligaziuns d'expensas ch'existan en leschas chantunalas. Per quest intent vegnissan per exempel introducidas dimensiuns per contribuziuns u integradas disposiziuns facultativas. Las revisiuns da las leschas vegnan fatgas sistematicamain tenor l'aspect da la flexibilisaziun da las finanzas ed independentamain d'auters basegns da revisiun eventuals.

Il project GrFlex augmentia las pussaivladads dal Cussegl grond d'influenzar la politica da finanzas. Uschia mussian evaluaziuns correspundentas che las expensas che possian vegnir influenzadas sur il preventiv en il sectur da las contribuziuns e dal persunal sa dublegian quasi – declera la regenza.

Quant enavant che las libertads d'agir ch'existian gia e talas che vegnan stgaffidas da nov duain vegnir duvradas effectivamain, stoppia vegnir examinà e decidì en in segund pass – numnadamain lura, cur ch'ellas fetschian da basegn. Co che quai è lura da prender per mauns prevesa GrFlex er gia: Las cundiziuns generalas vegnissan determinadas en in concept dal proceder per in pachet da distgargia (concept PD).

RR novitads 10:00