Siglir tar il cuntegn

Header

cuntegn

Grischun dal Sid Regenza grischuna na vul betg serrar tut ils plazzals

La regenza grischuna na vul betg serrar cumplettamain tut ils plazzals da construcziun en la regiun Moesa. Las pretensiuns ch'ils deputads dal district Moesa avevan drizzà a la regenza na sajan betg cumpatiblas cun las prescripziuns da la Confederaziun. Quai scriva la Chanzlia chantunala.

La regenza haja dentant chapientscha per ils basegns da las valladas dal sid. Cunquai ch'ellas sajan fitg datiers dal Tessin ed da l'Italia stattan ellas, sco era l'Engiadina, avant sfidas spezialas. Blers affars d'interess public sajan dependents da collavuraturs che penduleschian da l'Italia u dal Tessin. Tegnair liber il cunfin saja perquai da grond interess per questas regiuns.

Prescripziuns èn cleras

En quest connex èn las prescripziuns da la Confederaziun, che valan actualmain, cleras: Ellas scumondan al chantun da prender ina tala mesira. Quai han confermà anc ina giada consultaziuns cun il cusseglier federal Alain Berset. Il chantun sustegna la tenuta da la Confederaziun che regulaziuns naziunalas sajan las meglras schanzas per impedir la derasaziun dal coronavirus.

Analisar situaziun

L'entschatta da l'emna proxima vulessan ils cussegliers guvernativs Peter Peyer e Marcus Caduff visitar quellas regiuns. Plinavant sa scuntran els cun represchentants da las regiuns al cunfin cun il Tessin e l'Italia per analisar la situaziun e guardar sco proceder vinavant.

Ord l'archiv

Video
La regiun Moesa prenda mesiras rigurusas
Or da Telesguard dals 12.03.2020.
laschar ir

RTR novitads 17:00