«Jau vuless engraziar grondamain a tut ils collavuraturs e las collavuraturas da la Hamilton a Panaduz che han malgrà tut las sfidas da la pandemia producì ils apparats da respirar. Quai n'è betg be stà indispensabel per la Svizra, mabain d'impurtanza mundiala», ha il cusseglier federal Ignazio Cassis ludà oz las collavuraturas ed ils collavuraturs da la Hamilton a Panaduz a chaschun da sia visita. Ad el sco Tessinais saja er impurtant da menziunar la gronda prestaziun ch'il Grischun haja fatg sco regiun perifera.
Empustaziuns van enavos
Durant la pandemia ha la firma Hamilton producì tut a dubel. En il vair senn dal pled – ella ha augmentà la producziun dad apparats da respirar da 15'000 tocs l'onn 2019 sin 39'000 apparats il 2020. Il medem mument ha la firma uschia er dublegià la svieuta sin 1,2 milliardas francs.
Las empustaziuns per ils apparats da respirar sajan uss dentant idas enavos, ha ditg il CEO da la Hamilton, Andreas Wieland: «La producziun dad apparats da respirar vegn a sa regular sin il nivel dad avant la pandemia». La Hamilton dumbra actualmain 320 persunas dapli che avant la pandemia. Sin la dumonda sche quai veglia dir, che tut las novas persunas che la Hamilton ha engaschà per pudair producir, perdian lura puspè la plazza, ha il CEO respundì: «Na, nus avain ina massa novs apparats che vegnan or sin champs, nua che nus eran enfin uss betg activs, e quels duain cumpensar il regress da las empustaziuns.« La Hamilton tschertga schizunt anc dapli persunas, var 100 plazzas èn scrittas or.
In zic dapli normalitad
Er quai che pertutga ils servetschs da producziun saja turnà in zic normalitad tar la Hamilton. Anc l'ultim onn aveva la firma dumandà lubientschas da pudair producir er la dumengia per pudair far servetschs en etappas e garantir ina producziun da 24 uras per di, 7 dis per emna. Uss sajan be pli singulas partiziuns vi da producir tant.
Sfidas cun il material
Ina sfida è er stà, da chattar avunda material – cunzunt or da la China ha la Hamilton gì problems da survegnir quai ch'els avevan empustà. U che eroplans na sajan betg sgulads ubain che containers hajan gì retard. Er actualmain saja il material anc in problem. Cunzunt sin il sectur da l'electronica manchian cumponentas, cunquai che l'industria d'autos saja puspè activa, «qua stuain nus magari ans defender», uschia il CEO.
