Cunzunt la mancanza da giasts esters e giasts da commerzi hajan chaschunà il regress istoric. Il sectur da giasts svizzers haja cun 9% pertschient dà in regress survesaivel. Durant ils mais da record da fanadur fin october hajan svizras e svizzers pudì cumpensar per part las perditas.
Il rapport menziunescha plinavant l'impurtanza economica. Dapli che la mesadad dals affars d'hotellaria hajan stuì far diever da credits da Covid-19 cun in volumen total da 5 milliardas francs. Durant ils mais mars fin matg 2020 sajan 62% dal persunal da hotellaria stà en lavur curta, durant ils mais november e december 3%. Cunzunt la hotellaria en las citads è pertutgada fermamain da la situaziun. Malgrà ch'il Grischun haja ils pli blers letgs, haja il chantun cun -9% be in relativ pitschen regress en cumparegliaziun cun las regiuns urbanas.