Durant la stagiun d'enviern 2019/20 èsi vegnì registrà be mez uschè bleras pernottaziuns en las chamonas CAS dal Grischun sco l'onn avant. Pervi da la pandemia era la fatschenta da Pasca, ch'è fitg essenziala per las bleras chamonas, quasi crudada ora dal tut.
Persuenter è la stagiun da stad stada meglra che spetgà. Bleras Svizras e Svizzers sajan ids en muntogna, uschia che las chamonas grischunas han dumbrà la stad be 10% damain pernottaziuns che l'onn avant.
Pli schlet enviern da l'istorgia
Guardà sur l'entira Svizra han las chamonas dumbrà l'enviern en total 24'000 pernottaziuns, dus terzs pli pauc che l'enviern 2018/19. L'enviern da l'onn passà è uschia stà la stagiun la pli schletta da l'istorgia da las chamonas da CAS.
Dal matg fin l'october hai dà en l'entira Svizra passa 240'000 pernottaziuns, 14,5% pli pauc che la stad da record 2019. Cumpareglià cun la media dals ultims 10 onns munta la reducziun da pernottaziuns schizunt be a 3,5%.