Ch'il persunal da tgira survegnia ina premia per indemnisar ils sforzs durant il temp da la pandemia, pretenda l'incumbensa parlamentara Rutishauser. La regenza grischuna propona al Cussegl grond da refusar ina tala incumbensa. Da decider schebain il persunal da tgira ha dabun ina premia u betg , è tenor la regenza grischuna sulettamain chaussa da las instituziuns da sanadad – e betg dal chantun.
Differenzas chantunalas
Auter ch'en auters chantuns saja il Grischun numnadamain betg purtader da las instituziuns da sanadad. Sco la regenza scriva en sia resposta sin l'incumbensa, hajan tschertas instituziuns er gia decidì da pajar ina premia. Vitiers vegnia che la decisiun davart ina premia saja ina cumpetenza da las partidas dal contract da lavur, pia da l'autonomia privata.
Custs da passa 6 milliuns francs
Tut en tut cumpigliassan ils custs per ina premia da corona per il persunal da tgira tenor calculaziuns da l'uffizi da sanadad grischun radund 6,2 milliuns francs. Sche l'incumbensa vegniss acceptada dal Cussegl grond, muntass quai ch'il chantun sa participass cun circa 4,2 milliuns francs.
