Siglir tar il cuntegn

Header

video
Las cifras da nov infectads creschan – tge muntai quai ussa?
Or da RTR Social dals 09.10.2020.
laschar ir
cuntegn

Infecziologa «Las cifras na pon ins betg congualar in ad in»

Ils ultims dis ha il BAG annunzià mintgamai pli che 1’000 infecziuns novas al di – tantas sco per part durant il lockdown. Congualar las cifras in ad in na possian ins dentant betg, manegia l’infecziologa Alexia Cusini.

Durant il lockdown hajan ins testà surtut las persunas da la gruppa da ristg. Bleras persunas ch’eran infectadas cun il coronavirus n’hajan lura gnanc fatg in test. Oz vegnia dentant testà mintgin cun sintoms. E dapli persunas ch’ins testeschia e dapli persunas infectadas ch’ins chattia. Pia: Bain ch’il BAG annunzia il mument tantas infecziuns sco durant il lockdown, saja la situaziun actuala anc pli lucca che durant la primavaira. La cifra zuppada saja il mument in toc pli bassa. Quai veglia dentant tuttina dir, ch’ins stoppia vinavant resguardar las reglas d’igiena.

Cifra d'ospitalisaziuns

Ina cifra che gida a stimar la situaziun, saja tenor Alexia Cusini, infecziologa da l'Ospital chantunal, la cifra d'ospitalisaziuns.

Quellas cifras van maun en maun: Dapli cas ch’i dat, pli aut è il privel ch’i dat tranter quels persunas grevamain malsaunas.
Autur: Alexa Cusiniinfecziologa da l'Ospital chantunal

Il mument sajan pli paucas persunas infectadas en l’ospital che durant il lockdown. Tenor l’infecziologa è la cifra d'ospitalisaziuns bunamain pli impurtanta che la cifra da novas infecziuns. L'intent da contact tracing, distanza e mesiras d’igiena saja la finala d’evitar ch’il sistem da sanadad è surdumandà. Perquai stoppian ins empruvar da tegnair bassa la cifra d'ospitalisaziuns.

Quota da positivitad

La quota da positivitad mussa, quants dals tests ch’èn stads positivs. Il mument èn quai tenor SRF var 6% da tut ils tests. Sche quella cifra crescha vinavant, vul quai er dir, ch’i dat en general dapli persunas infectadas. Ina bassa quota, saja in segn che pli paucas èn s’infectadas. Durant la primavaira saja la quota stada anc in toc pli auta.

Tenor l'Organisaziun mundiala da la sanadad munta ina valur sur 5% ch'igl è fitg probabel che la cifra zuppada d'infecziuns creschia. Quai cunzunt sch'i na vegn betg testà dapli en cumparegliaziun cun il dumber da cas che crescha.

RTR actualitad 17:00

Artitgels legids il pli savens

Scrollar a sanestra Scrollar a dretga