Siglir tar il cuntegn

Header

video
Iniziativa per ina chatscha etica – in purtret da l’inizianta
Or da Telesguard dals 17.05.2021.
laschar ir. Durada: 4 minutas 18 Secundas.
cuntegn

Iniziativa per chatscha etica Aderents han lantschà lur campagna da votaziun

Ils 13 da zercladur decida il suveran Grischun davart l’iniziativa per ina chatscha etica e cumpatibla cun la natira. Il comité d'iniziativa ha uss lantschà sia campagna.

Lantschà il cumbat
Legenda: Cun tamburs e paucas ha il comite d'iniziativa lantschà sia campagna. RTR, Lucia Parolini

«Revoluziunar la chatscha». Cun quest slogan ha il comité d'iniziativa lantschà ses cumbat da votaziun.

Per tge vai insumma?

Avrir la box Serrar la box

Quest'iniziativa deriva da protecturs d'animals e vuless restrenscher la chatscha grischuna cun total nov puncts, tranter auter:

  • Proteger en general vatgas-tschierv e chauras-chavriel che portan e che han pitschens
  • Scumandar traplas per pigliar animals e scumandar da metter estga per carmalar animals
  • Scumandar da sajettar tut ils utschels che n'èn betg protegids tras la lescha federala
  • Introducir in paus d'enviern dal 1. da november enfin il cumenzament da la chatsch'auta
  • Per ir a chatscha valan limitas d'alcohol en il sang tenor las leschas davart il traffic sin via
  • Tar l'Uffizi chantunal da chatscha e pestga sco era en la cumissiun da chatscha ston esser represchentads a moda paritetica ils protecturs d'animals/chatschaders sco era nun-chatschaders.

Ils arguments principals

audio
Votaziun 13-06: Chatscha etica – ils arguments dals aderents da l'iniziativa
ord Actualitad dals 17.05.2021.
laschar ir. Durada: 2 minutas 45 Secundas.

Tenor ils iniziants stoppian ins proteger vatgas-tschierv e chauras-chavriel che portan e che han pitschens. Quai saja in fraud a la natira, sche animals pitschens perdan uschia lur mamma.

Plinavant vul l'iniziativa scumandar la chatscha a partir dal prim da november. Ils animals dovrian tut lur energia per l'enviern. Tar l'Uffizi chantunal da chatscha e pestga sco er en la cumissiun da chatscha stoppian er protecturs d'animals esser represchentads. Uschia na duai la protecziun d'animals betg vegnir a la curta.

Parlament e regenza chantunala han dentant schon recumandà da dir Na a l'iniziativa.

Er ils adversaris han lantschà lur campagna da votaziun. Tenor els periclitescha l'iniziativa tranter auter la chatscha grischuna, la selvaschina ed il guaud.

Desister da «maletgs sanguinus»

Sin ils placats da la campagna da votaziun dal comite d'iniziativa na chattan ins nagins animals: ni «animals gnocs», ni animals morts. Il comité veglia metter sin messagis clers.

Maletg da la campagna
Legenda: Uschia vesan or la campagna per l'iniziativa. RTR, Flurin Clalüna

«L'odissea» da l'iniziativa

Schon il 2016 ha il parlament chantunal tractà l'iniziativa. En trais puncts ha el dentant declerà l'iniziativa per nunvalaivla. Ils iniziants han suenter fatg dus recurs: In emprim recurs tar la Dretgira administrativa chantunala. Pli tard hai anc dà anc in segund recurs tar il Tribunal federal a Losanna. Quel ha declerà tut l'iniziativa per valaivla.

Grafica
Legenda: Ils puncts blaus simboliseschan glisch verda, ils cotschens muntan che l'instanza ha declerà quests sco nunvalaivels u per be per part valaivels. RTR Grafica
audio
Per tadlar: curt e cumpact
ord RTR Audio dals 17.04.2021.
laschar ir. Durada: 1 minuta 5 Secundas.

Dossier online

Avrir la box Serrar la box

Sin in clic tut las fatschentas federalas, chantunalas e communalas: rtr.ch/votaziuns

RTR novitads 17:00

Artitgels legids il pli savens