Siglir tar il cuntegn
Inhalt

Chantun Interrupziuns da forza electrica en l'entir chantun

Pervia da la naiv hai dà la fin d'emna en bunamain tut las regiuns en il Grischun disturbis en la rait d'electricitad, uschia communitgeschan diversas ovras electricas en il chantun.

trais lavurers mettan puspè en funcziun ina lingia d'electricitad
Legenda: La naiv bletscha e greva ha cupitgà plantas e rut roma ed uschia interrut il provediment electric. (maletg da simbol) Keystone

La notg sin dumengia èn pliras vischnancas en l’Engiadina Bassa stadas senza forza electrica. Sco las Ouvras Electricas d’Engiadina SA scrivan, sajan – sche er betg tuttas il medem mument – las vischnancas da Zernez fin Martina stadas pertutgadas. Tras la naiv bletscha e greva sajan bostgs crudads sin las lingias al liber. Entaifer paucas uras hajan las chasadas però puspè gì electricitad, scrivan las Ouvras Electricas d'Engiadina SA.

Interrupziuns er en autras regiuns

Er las Ovras dal Rain Posteriur han gì da cumbatter cun interrupziuns. Las vischnancas da Ferrera, Avras e la Mantogna da Schons sajan stadas per temp senza electricitad la dumengia. Er la Repower conferma ch'i haja dà disturbis. En tut 16 cas e quai cunzunt en Surselva, il Partenz sco er en l'Engiadina Bassa. Pertutgads sajan mintgamai stads mo singuls quartiers da vitgs e betg entiras vischnancas. La dumengia saira è la situaziun dentant sa normalisada en l'entir chantun e tut las chasadas han puspè gì current.

Ovras electricas vinavant en prontezza d'alarm

Pervia da la naiv u plievgia intensiva che vegn spetgada per l'entschatta da l'emna èsi tut tenor er quests dis da far quint cun disturbis en il provediment d'electricitad. Quai conferman pliras ovras electricas.

RR novitads 12:00