L’interess da daventar tgirunz è grond

«I manca il persunal», hai adina puspè gì num ils davos onns or dal sectur da tgira. Mancanza d’interess para dentant betg d’esser la raschun. Pertge tenor l'uffizi per la furmaziun professiunal dal Grischun, èn ils emprendissadis en quest sectur fitg dumandads tar ils giuvenils grischuns.

Tgirunza fa si il letg dad in pazient. Bild in Lightbox öffnen.

Legenda da maletgs: Giuvenils elegian pli savens ina plazza d'emprendissadi en la tgira. Keystone

Il grond interess dals giuvenils per in emprendissadi en il sectur da tgira è bain allegraivels, dentant muntia quai insumma betg che la situaziuns da persunal saja sa meglierada l’ultim temps, di Marlis Alig, la manadra da fatschenta da l'uniun da tgirunzas e tgirunzs dal Grischun.

«  Igl ha anc adina memia paucas tgirunzas e tgirunzs. »

Marlis Alig
Uniun da tgirunzas e tgirunzs GR

«Ils manaschis èn anc adina dependents da mintga persunas che lavura en quest sectur respectiv che vul far qua l’emprendissadi», di Marlis Alig. «Igl ha anc adina memia paucas tgirunzas e tgirunzs.» Las plazzas d’emprendissadi en il sectur da tgira sajan uschè dumandadas, perquai ch'i na dat betg uschè bleras. Blers manaschis na scrivian simplamain betg ora da quellas plazzas.

Ils custs èn ina raschun

Las raschuns èn differentas: Tar in ni l'auter na va quai per exempel betg pervia da la grondezza dal manaschi. Dentant era ils custs per in tala plazza è ina raschun daco ch'ellas na vegnan betg screttas ora.

Il recept per meglierar la situaziun è tenor la manadra da l’Uniun da tgirunzas e tgirunzs dal Grischun: Far in pool da daners, nua che mintga instituziun che na porscha betg plazzas d’emprendissadi stuess pajar insatge, e quellas instituziuns che porschan emprendissadis survegnissan perencunter daners or da quest pool per mintga plazza d’emprendissadi.

«Ina buna schliaziun per reparter ils custs pli gulivà sin tuts», manegia Marlis Alig. Pertge praticamain mintga instituziun, mintga chasa da tgira ed era la Spitex cumbattian cun ils custs e sajan uschia sut squitsch.

«  Uschè grond che l’interess da vegnir tgirunz è tar ils giuvenils, constatain nus era che blers chalan era puspè. »

Marlis Alig
Uniun da tgirunzas e tgirunz GR

L’interess per in mastergn da tgirunz è bain grond tar ils giuvenils, blers chalan dentant era puspè – baud ni tard. «Igl è in mastergn, nua ch’ins sto schon esser conscient ch’ins sto era lavurar la fin d’emna e la notg», di Marlis Alig. «Blers percorschan pir pli tard che quai n’è en sasez betg quai ch’els vulan e bandunan lura il mastergn.»

Engraziaivels per las mammas che turnan

Zunt engraziaivels èn ins perquai che bleras dunnas vulan puspè turnar en il mastergn da tgirunza suenter ina pausa da famiglia. Persunas ch'i dovri fitg il mument, concluda Marlis Alig, la manadra da fatschenta da l'uniun da tgirunzas e tgirunzs dal Grischun.