Per il Cusseglier guvernativ e minister d'economia dal Grischun Marcus Caduff è la decisiun dal Cussegl federal ferm tubac. El n'avessi betg quintà ch'il Cussegl federal prendia oz questas mesiras e serria er las butias.
Il medem vala per Maurus Blumenthal, il directur da l'uniun d'artisanadi e mastregn dal Grischun. La decisiun dal Cussegl federal saja per el ord vista dal svilup epidemiologic actual fitg paradox.
I vegn argumentà cun quels models da quai virus englais, sut quest context pon ins chapir la decisiun, dentant per blera glieud e per bleras fatschentas n'èsi betg chapibel.
«Ils daners da sustegn èn il minimum»
Entant ch'il Cussegl federal ha decis da rinforzar las mesiras a partir dal glindesdi, ha el era decis da schluccar las premissas per survegnir sustegn dal maun public. Gist per la gastronomia ed ils manaschis dal temp liber ina decisiun impurtanta. Ed er per il chantun, el possia uss mirar da sustegnair l'economia ed el saja er pront da far quai, di Caduff. Ils daners che stettian dentant actualmain a disposiziun na vegnian probabel betg a tanscher.
Er Maurus Blumenthal è cuntent che las premissas per il sustegn tar cas da direzza vegnan levgiadas. Il sustegn dal Cussegl federal saja dentant il minimum e stoppia er cuntinuar. L'economia na saja betg segirada entras questas mesiras, ed ils donns finanzials per l'economia sajan gigantics. La Confederaziun stoppia prender responsabladad per las decisiuns ed star grad per ils custs.
La gastronomia è cuntenta ch'ils daners vegnan
Che la gastronomia survegn pli sempel daners da sustegn è in levgiament per la branscha, di Annalisa Giger, suprastanta da gastrosuisse. Las mesiras porschian segirtad che las interpresas possian uss finalmain er pajar lur quints.
Giger speria uss ch'ils daners chattian senza gronda birocrazia la via en ils dretgs lieus. La gastronomia dovria ils daners ed ella speria che quels arrivian fin la fin da favrer. Per in'emprim sustegn tanschia, ins speria dentant er fitg ch'ins possia l'entschatta mars alura puspè avrir las portas da las fatschentas.
