Siglir tar il cuntegn

Header

Navigaziun

Legenda: Tadlar il audio Bunura: Il cumbat per il surviver dals circus. Durada 03:00 minutas.
Or da Novitads dals 09.07.2019.
cuntegn

Las sfidas d'in circus «Betg s'inventar da nov – sa vender meglier»

«Manescha libra!» hai puspè gì num questa fin d'emna a Cuira. Il Circus Royal è siglì en ed ha surpiglià la turnea dal Circus Nock. Il Circus Nock ha stuì dar giu quella, perquai ch'el ha annunzià concurs il matg da quest onn. La dinastia dal pli vegl Circus svizzer va a fin suenter 158 onns. Ma betg be il Circus Nock ha da sbatter – er il Circus Royal ha gì problems ils ultims onns.

Sco quai che Oliver Skreinig, il directur dal Circus Royal ha declerà, haja la stagiun da quest onn cumenzà mal. Il circus ha da cumbatter cun diversas sfidas. Da bleras da questas chaussas n'è il public gnanc pertschert il mument ch'el sesa en la manescha e giauda las producziuns.

Davos las culissas:

  • I saja grev da chattar collavuraturs ch'èn pronts da viagiar cun il circus, saja quai camiunists u gidanters che monteschan la tenda, ma er mastergnants per il lavuratori.
  • Adina dapli plazzas adattadas per il circus vegnan surbajegiadas, gist en lieus urbans. Ed i dettia er adina pli paucas citads che mantegnian plazzas da festa ch'era in circus pudess nizzegiar.
  • La basa legala far producziuns artisticas saja sa midada. Cun quai è la chargia administrativa creschida ferm ils ultims onns.
  • Ozendi ha la glieud fitg ina gronda schelta d'autras purschidas per sa divertir. Ins na spetga betg pli l'entir onn be sin ch'il circus vegn en la regiun.

En la manescha:

  • En il circus datti savens pli paucas producziuns cun animals. Ina raschun è er qua che la basa legala è vegnida pli severa.

Il circus è attractiv

Tenor Oliver Skreinig sajan quels circus che marschian il meglier, gist quels che fetschian circus a la scola veglia. El è perquai er da l'avis ch'il circus na stoppia betg s'inventar da nov:

Jau na crai betg ch'il circus sto s'inventar da nov. El ha uschè bleras bellas fassettas. Ma il circus sto sa vender meglier. El sto puspè animar meglier la glieud da chattar la via en tenda.
Autur: Oliver Skreinigdirectur dal Circus Royal

Sco Skreinig di enavant sajan ils problems numnads sura pli gronds ch'il public. Il public saja qua. Gist en Svizra sentian ins che la populaziun haja fitg gugent il circus.

Ord l'archiv:

RR actualitad 07:00