- lavurs da planisaziun cumenzan uss
- realisaziun sin il mez d'avrigl da quest onn
- er en l'avegnir datti duas gasettas
- probablamain vegni reducì plazzas
Cun ina redacziun communabla saja pussaivel da spargnar custs e da nizzegiar sinergias. Pli paucas lecturas e pli paucs lecturs ed er adina pli paucs inserats sforzian las gasettas quotidianas da s'adattar ed optimar ils custs, uschia argumentescha la chasa editura.
Igl è ina dumonda da sinergias e dad optimar custs. Nus savain tuts che las medias èn sut squitsch. Perquai stuain nus prender mesiras che fan uschè pauc mal sco pussibel.
Edir duas gasettas quotidianas en il Grischun cun duas redacziuns separadas saja adina pli difficil da finanziar. Ord quai motiv vegnia la Somedia a producir en l'avegnir las gasettas «Bündner Tagblatt» e «Südostschweiz» cun ina redacziun communabla.
Vinavant duas gasettas
Ils dus titels vegnan mantegnids, empermetta Somedia. La cumpart da las parts redacziunalas cuminaivlas vegnia engrondida. Ils layouts s'orienteschian al caracter classic d'ina gasetta quotidiana.
Nova schefredacziun
La nova redacziun ch'è anc da furmar sa cumpona da collavuraturas e collavuraturs da las redacziuns da fin uss. Las persunas vegnan nominadas ils proxims mais. La schefredactura Martina Fehr (Südostschweiz) ed il schefredactur Luzi Bürkli (Bündner Tagblatt) han omadus in sez en la nova schefredacziun. Las mesiras planisadas vegnan ad avair consequenzas per las plazzas. Ina reducziun da plazzas en las redacziuns sco er en las partiziuns tecnicas saja pussaivla.
Il nov concept da gasetta vegn ad esser realisà l'avrigl. Lura cumparan las duas gasettas en furma adattada e pli frestga, scriva l'interpresa.
La «Südostschweiz» ed il «Bündner Tagblatt»
| 14.01.1984 | Il «Bündner Tagblatt» vegn cumprà da la Stampa Romontscha |
| 09.01.1986 | Futur intschert per il «Bündner Tagblatt» – Problems finanzials |
| 08.11.1986 | Futur intschert per il «Bündner Tagblatt» – Christoph Blocher surpiglia maioritad da las aczias |
| 24.06.1996 | La «Bündner Zeitung» ed il «Bündner Tagblatt» collavuran cun ils inserats e la stampa |
| 10.03.2006 | Las redacziuns da sport da la «Südostschweiz» ed il «Bündner Tagblatt vegnan fusiunadas |
| 03.05.2006 | L'emprima «Südostschweiz am Sonntag» |
| 25.09.2009 | Mesiras da spargn perquai che la gruppa da medias «Südostschweiz» n'ha betg avunda entradas tras reclama |
| 30.08.2013 | Il «Bündner Tagblatt» survegn in nov layout |
| 03.10.2013 | Nova chasa da medias per la «Südostschweiz» |
| 20.01.2015 | La «Südostschweiz» survegn in nov layout |
| 24.10.2017 | «Somedia» e «Basler Zeitung vulan collavurar |
| 26.01.2018 | Collavuraziun tranter «Somedia» e «Basler Zeitung va da la glatscha giu |
| 30.01.2018 | «Bündner Tagblatt» e «Südostschweiz» cun redacziun communabla |
RR novitads 11:30