Cun la sessiun d'avust va er gist la mesadad da la legislatura a fin, quai vul dir dus dals quatter onns. Ina legislatura che ha purtà bleras fatschentas extraordinarias dasper las incumbensas ordinarias dal parlament.
Uschia han las deputadas ed ils deputads stuì instradar ina PUK per intercurir il cartel da bajegiar, eleger novs derschaders per la Dretgira chantunala suenter l'affera da giustia e s'occupar cun ina crisa – la crisa da corona.
Dasperas ha il parlament er revedì la lescha da taglia ubain la planisaziun dal territori, è stà extra muros a Puntraschigna ubain ha gì da discutar sur da ses agen futur – il Tribunal federal ha numnadamain constatà che la mesadad da las deputadas e dals deputads n'èn betg elegids confuorm a la constiuziun. I dovra en il futur in nov model per eleger il Cussegl grond.
Dapli disciplina
I para dentant, sco sch'il nov parlament haja dapli disciplina che anc il vegl. Els vegnan adina puspè da tegnair en il plan da lavur – ils votums èn daventads pli curts. Ed er ils «novizs» han gia en las emprimas sessiuns prendì pliras giadas il pled e mussà engaschi. Cunzunt er las dunnas èn s'engaschadas savens. Aita Zanetti da la PBD è schizunt – suenter dus onns, pia suenter be ina mesa legislatura – vegnida elegida sco vicepresidenta dal Cussegl grond.