En general san ins dir che las uniuns dumandadas èn cuntentas cun la proposta da la nova strategia da la Lia Rumantscha (LR).
Il sboz da discussiun
Dentant...
- La Giuventetgna Rumantscha crititgescha che la strategia saja memia generala, memia vasta e betg precisa avunda.
- Quai vesa la Surselva Romontscha auter. Il president, Alberto Palaia, di ch’ins duai plitost vesair la strategia sco ina glista da «check». Quai na veglia betg dir ch’ins stoppia lavurar mintg’onn vid tut ils puncts. I dettia lura onns ch’ins lavuria pli fitg vid in punct ed auters onns pli pauc.
- In auter punct che la Giuventetgna Rumantscha crititgescha è che la giuventetgna na vegnia betg menziunada, di Vital Albin.
- Era l’Uniun dals Grischs han critica: Per els vegnia mess memia pauc paisa sin il barat tranter ils idioms.
- Ils commembers da l’Uniun Rumantscha Grischun Central crititgeschan che la Lia Rumantscha n'haja betg ina tenuta clera envers il Rumantsch Grischun. Vinavant mancan tenor els las visiuns e la LR stoppia era sustegnair ils Rumantschs en las regiuns e betg mo en la diaspora. D’ina opiniun sumeglianta è era la Surselva Rumantscha.
- Tenor l’Uniun per litteratura Rumantscha possian ins porscher in program pli vast a famiglias en la diaspora. Cun ils puncts che hajan da far cun cultura e litteratura sajan els cuntent, di la presidenta Manuela Balett.
- Pro Svizra Rumantscha di tranter auter ch'i na saja betg in bun mument per far ina nova strategia. Pertge il nov secretari general duai era savair decider cun la strategia.
- La Societad Retorumantscha haja tenor lur president, Cristian Collenberg, nagut d’agiuntar.
La Fundaziun Medias Rumantschas sco era Pro Idioms n'han betg vulì dir insatge envers RTR. Las ulteriuras uniuns n’eran betg cuntanschiblas.
