Siglir tar il cuntegn

Header

audio
En Grischun na datti nagina unda da «lockdown-babys»
Or da Actualitad dals 05.03.2021.
laschar ir. Durada: 03:22 minutas.
cuntegn

«Lockdown-babys» en Grischun Ospitals e spendreras na sentan betg dapli naschientschas

L’onn passà han las medias adina puspè scrit, che blers pèrins hajan fatg pops e ch’i vegnia a dar ina unda da «lockdown-babys». Il december ed il schaner avess ella gì dad arrivar. Da questa unda n’han las spendreras grischunas ed il ospital da dunnas Fontana sentì nagut.

I n’ha betg dà dapli naschientschas. Nus avain percurschì nagina differenza
Autur: Angelica Signermanadra da las spendreras independentas grischunas

Era en il ospital regiunal da Glion n’han ins sentì pauc u nagut. Il december sajan naschì circa tants pops sco uschiglio il december en media, di Claudia Käch, directura dal ospital. Il schaner hajan ins dentant gì 19 naschientschas, entant ch’ins haja uschiglio 14 naschientschas en media.

La directura na vesa en questa differenza dentant nagin indizi per in boom da pops. Tscherts onns hajan ins dapli pops il december ch’il schaner. Auters onns saja quai il cuntrari. La media da quels dus mais restia dentant adina circa la medema. Sch’i haja questa giada dà en media dals dus mais ina u duas naschientschas dapli, na saja quai nagina differenza essenziala.

Nagin effect evident

Era il ospital da dunnas Fontana a Cuira na fastizescha nagin effect da lockdown. Il december 2019 hajan ins perfin gì in zichel dapli naschientschas ch’il december 2020, di Dajan Roman, pledader dal ospital. Ed era il schaner 2020 hajan ins gì levet dapli naschientschas ch’il schaner 2021.

Naschientaschs il mais december e schaner

Avrir la boxSerrar la box

Il december 2020 dumbra il register d'abitants 131 pops e poppas dal december. Ils trais onns precedents eran quai 121, 151 e 134 uffants.

Il schaner 2021 dumbra il register 142 pops e poppas. Ils trais onns precedents èsi mintgamai 123, 147 ed 138 uffants.

L’uffizi da statistica dal Grischun conferma las experientschas dad ospitals e spendreras. In effect dal lockdown n’è betg visibel, di Patrick Casanova, manader da l’uffizi. El sa referescha sin la statistica dal register d’abitants. Las cifras dal december 2020 e dal schaner 2021 sajan bain anc provisoricas. Ma il statisticher parta da quella ch’era las cifras definitivas na demussan naginas midadas da num.

RTR actualitad 12:00

Artitgels legids il pli savens

Scrollar a sanestra Scrollar a dretga