Siglir tar il cuntegn

Header

Navigaziun

cuntegn

Malauras en il Grischun La Val Avras è serrada giù

Actualmain è la Val d'Avras serrada giu dal rest dal mund. Tranter Calantgil (Innerferrera) e Cresta è vegnì giu crappa, quai conferma la polizia chantunala. Persunas n’èn betg vegnidas blessadas. La via resta serrada fin almain damaun a las duas. Lura vegn infurmà da nov.

Tenor il president communal da Ferrera Albert Rauch èn ils geologs stads èn il lieu questa saira per giuditgar la situaziun. I saja dentant stà memia malsegir per cumenzar a rumir.

Plievgia anc fin suenter mesanotg

Il cumenzament da l'emna era fitg bletsch per il Grischun – ed i vegn a plover vinavant anc fin a mesanotg. Ina gronda frunt vegnia a purtar las proximas uras radund 20-50 mm plievgia, di Gaudenz Flury da SRF Meteo:

Fin mesanotg èsi era anc da quintar cun bovas da gera. L'aura sa megliereschia alura dentant spert e suenter mesanotg saja quai be pli da quintar cun bovas locals. Damaun èsi betg pli da quintar cun plievgia intensiva, singuls uradis possia quai dentant anc adina dar, uschia Gaudenz Flury da SRF Meteo.

Pervi da la plievgia annunziada han er las autoritads da Surses decis dad evacuar il bajetg da l'alp Foppa sur Salouf per la notg proxima. L'aual gist daspera è ì sur il letg da l'aua ora ed ha destruì ina part da la pastgira ed ina punt:

Ina bova.
Legenda: Ina bova sin l'Alp Foppa sur Salouf gist sur il bajetg d'alp. MAD, Marc Sonder

Las consequenzas pel traffic en Grischun:

  • Il pass dal Lucmagn resta serrà almain tochen mardi marvegl a las otg. Quai pervia da bovas da glitta da vart dal Tessin. Il tschancun grischun fin l'ospizi è dentant avert.
  • Il pass dal Malögia è puspè avert dapi las 16:30.
  • Serrada è la via d'Avers tranter Cresta ed Innerferrera/Calantgil.
  • Puspè avert per il traffic è il Pass dal Spleia.

Persunas na sajan betg vegnidas blessadas pervi da la plievgia intensiva. Las lavurs da rumida duran anc. Quai ha confermà la Polizia chantunala a RTR. Tge donns materials che las plievgiadas hajan causà n'è anc betg cler.

Aua gronda er a Sedrun – puspè ina giada

A Sedrun ha l'aual Run puspè procurà per rumpatesta. L'aua gronda ha periclità er ina punt – enturn mezdi era l'aual dentant sa calmà in zic.

«eruptio montis» – las bovas tutgan tar l’istorgia da Sedrun

Personen-Box aufklappenPersonen-Box zuklappen
Crap cun cifra 1837.

Bovas ed auas grondas enturn l’aual dal Run occupan ils da Sedrun dapi tschientaners. Gia il 1456 saja vegnì scrit dad ina «eruptio montis», in erupziun da la muntogna. Il 1691 hajan ins perfin stuì dischlocar la baselgia sa sogn Vigeli pervi da l’aual Run. Quai è da leger sut «Historia(s) e maletgs da Tujetsch», il link avra en ina nova fanestra en la rait. Pli documentada è la malaura gronda da l’avust 1834 durant la quala ch’il Run ha fullà ina nova via tras la vischnanca da Sedrun. Anc oz dat perditga in crap entasum il parcadi suenter il Drun da las stentas dals da Sedrun da quella giada: L’onn 1837 avevan els construì rempars per sa proteger da l’aual furibund. Amez quel rempar era il crap cun l’inscripziun 1837.

Plievgiada vegn ad avair causà dus morts en il Vallais

En il Vallais tschertgan las forzas da salvament anc adina in bab (37) e sia figlia (6). Els èn sparids dapi ch'ina bova sper Chamoson aveva tschiffà la dumengia saira lur auto. Il suentermezdi aveva la polizia annunzià da betg pli avair speranza da chattar las duas persunas vivas.

En il Vallais sajan pliras vias interruttas pervi da las malauras. Tranter auter er quella sur il Pass dal Nufenen.

RR novitads 07:30++