Siglir tar il cuntegn

Header

video
Tge imposant: il grippun da Brinzauls
Or da Giuventetgna dals 14.08.2019.
laschar ir. Durada: 6 Secundas.
cuntegn

Malauras – il di suenter Brinzauls ed Avras – trajects serrads

Curt & concis

  • Nov è er serrada la via chantunala tranter Lantsch e Brinzauls – quai pervi dad in grip da 50 fin 100 meters cubic.
  • In servetsch da helicopters procura per ils transports da ed en la Val d'Avras. Ella resta isolada per almain in’emna.
  • La via en la val S-charl è puspè averta.
  • Las plievgiadas dal glindesdi han causà bovas che serran giu las duas vals dal traffic.

Val d'Avras – sgols en ed or da la val

Pervi da la crudada da crappa resta la Val d'Avras isolada per circa in’emna. Quai ha confermà Paul Eicher da l’uffizi da construcziun bassa.

audio
Saira: Avras è isolà per almain in'emna
ord Actualitad dals 13.08.2019.
laschar ir. Durada: 2 minutas 31 Secundas.

Probabel cuzzian las lavurs enfin mardi, cun bell’aura pudess la via dentant gia vegnir averta gia pli baud. En il fratemp ha il president communal d’Avras Kurt Patzen ditg envers RTR, ch’ins haja organisà sgols. Quels vegnian fatgs a partir da questa saira las 17:00. Enfin ussa ins haja survegnì 35 annunzias da persunas che veglian returnar en la val u bandunar ella.

video
Val d'Avras – sgols en e da la val
Or da sil punct dals 13.08.2019.
laschar ir. Durada: 1 minuta 39 Secundas.

Radund 200 persunas sajan il mument bloccadas en Val d’Avras. La bova è vegnida giu sin via il glindesdi suentermezdi tranter l’ina e las duas, tranter Calantgil/Innerferrera e Cresta – quai suenter plievgia intensiva.

Lantsch-Brinzauls – via chantunala serrada

Almain fin damaun las 14:00 è serrada la via chantunala tranter lantsch e Brinzauls – quai pervi dad in grip da 50 fin 100 meters cubic, ch'è vegnì giu.

Tenor conferma da la polizia chantunala ruschnia la plaunca da Brinzauls pli fitg che usità. I na saja dentant betg critic. Il traffic vegnia svià.

Val S-charl – via puspè averta

La via en la Val S-charl è puspè averta. Quai han communitgà las autoritads communalas suenter avair revalità la situaziun. Pervi da bovas aveva il traject stuì vegnir serrà il mardi fin vers saira.

Ils ultims quatter onns aveva la vischnanca da Scuol adina puspè da cumbatter cun malauras e bovas amez la stad – surtut la Val S-charl era pertutgada.

Anc la fin da fanadur avevan las autoritads communalas annunzià dad avair installà in sistem da pilot per pudair reagir pli svelt sin situaziuns da privel tras bovas en la Val S-charl.

S-charl – las bovas dal 2014 e 2017

Avrir la box Serrar la box

L'avust 2014 ed il fanadur 2017 han pliras bovas zuglià plirs kilometers via en la Val S-charl. Temporals locals han mess en moviment massas da glera ed entiras gondas. 15 persunas cun lur autos eran bloccadas tranter las bovas. Ellas e 50 ulteriuras persunas en S-charl han stuì vegnir evacuadas cun l’helicopter. In miracul che naginas persunas èn mortas.

RR novitads 11:00++

Artitgels legids il pli savens