Tenor la Polizia chantunala saja la via sin la vart nord da la galaria Scopi cuvrida da crappa. Ils grips sajan fin quatter meters auts e blocheschian la via sin ina lunghezza da radund 30 meters. La bova è vegnida mesemna saira cun ca. 1'000 meters cubic material.
En consequenza resta il traject tranter Fuorns e Campra serrà il mument. Sche tut va sco previs pon ins forsa avrir puspè la via sur il Lucmagn questa fin d'emna, sco Pius Cavegn da l'uffizi da construcziun ha ditg ad RTR. Probabel haja la plievgia dals ultims dis e la naiv chaschunà questa bova.
Er serrada pervi dad ina crudada da crappa è la via sur il Pass dal Spleia.
A13 puspè averta
Entant èn l'autostrada A13 tranter Tusaun e Roveredo e la via chantunala tranter Tusaun e Valragn puspè charrablas senza restricziun . Quai ha confermà la Polizia chantunala sin dumonda da RTR. Oomaduas vias eran stadas serradas per motivs da segirezza suenter la plievgia intensiva e las auas grondas dals ultims dis.
RR novitads 06:00++
