Suenter trais onns al timun da la Lia Rumantscha è Martin Gabriel sa decis da sa retrair da ses uffizi sco secretari general per sa distgargiar da la responsabladad. Quai scriva la Lia. Gabriel restia tar la Lia Rumantscha e vegnia a surpigliar da nov incumbensas da project.
Lavurs a favur da la Rumantschia interesseschan mai pli fitg che manar l'interpresa.
El veglia uschia sa distgargiar da la responsabladad che quest uffizi portia, ha Martin Gabriel declerà en l'intervista cun RTR.
La plazza da la secretaria generala resp. dal secretari general vegn publitgada proximamain. Fin ch’ina nova scheffa u in nov schef operativ entra en uffizi, surpiglia la direcziun da la LR la gestiun, quai sut l’egida dal president Johannes Flury e da la suprastanza da la LR.
Trais onns secretari general
Martin Gabriel è entrà en uffizi sco secretari general il fanadur 2017. D’emprim ennà ha il project «Medias rumantschas 2019» gì in’auta prioritad entaifer ses pensum. L’onn 2019 ha la LR pudì terminar cun success il project: la Fundaziun Medias Rumantschas (FMR) è vegnida constituida, ina purschida da caracter da pionier per la Svizra. Medemamain durant il temp d’uffizi da Martin Gabriel ha la LR pudì festivar l’onn passà ses giubileum da 100 onns.
Promoziun regiunala e digitalisaziun
Durant sia activitad a la testa da la LR ha Martin Gabriel mess accents tranter auter en la promoziun regiunala e la digitalisaziun dal rumantsch. Martin Gabriel ha en pli accumpagnà l’elavuraziun dal sboz per ina nova orientaziun strategica da la LR ch’è da preschent en consultaziun.
