Siglir tar il cuntegn

Header

Video
La directura Ladina Heimgartner banduna RTR
Or da Telesguard dals 29.10.2019.
laschar ir
cuntegn

Medias Ladina Heimgartner banduna RTR

Ladina Heimgartner, directura RTR e vicedirectura generala SRG SSR, mida da la SSR tar la Ringier SA. Sco commembra dal comité directiv vegn ella a manar sut il CEO Marc Walder il nov «Corporate Center».

Suenter bunamain 13 onns tar la SSR, da quai sis sco directura da Radiotelevisiun Svizra Rumantscha (RTR) e dus sco vicedirectura generala SSR, ha Ladina Heimgartner decis da bandunar la SSR: «Jau hai gì in temp grondius tar la SSR e RTR. Ma oramai ch’jau hai passentà quasi mia entira vita professiunala tar la SSR ed en vista a mes 40avel anniversari, l’onn che vegn, sun jau pronta per ina midada», di Heimgartner.

Natiralmain bandun jau la SSR, RTR ed il Grischun cun malavita. Jau m’allegrel dentant era sin mia nova incumbensa tar la Ringier SA
Autur: Ladina Heimgartnerdirectura RTR

Cumenzà sia carriera tar la SSR ha ella en la vegliadetgna da 27 onns sco redactura dal Radio Rumantsch. Suenter trais onns a la testa dal ressort Reflexiun e vice-schefredactura ha ella midà tar la direcziun generala da la SSR, nua ch’ella ha organisà e manà la partiziun «Martgads e Qualitad». Il 2014 è ella vegnida elegida sco directura RTR, il 2017 è ella daventada vicedirectura generala SSR. Gilles Marchand, il directur general SRG SSR deplorescha zunt fitg questa sperdita.

Cun Ladina Heimgartner perdain nus ina directura premurada, fidaivla, stimada ed engaschada che ha dà a RTR ed er a tut la Rumantschia ina fatscha visibla en l’entira Svizra. Quai cunzunt sche nus pensain vid sia rolla en connex No Billag
Autur: Vincent Augustinpresident da SRG.R

Tar la chasa da medias Ringier vegn Heimgartner a far part dal comité directiv sco manadra dal nov «Corporate Center». «Cun Ladina Heimgartner gudagnain nus ina da las pli interessantas manageras da medias en l’Europa da lingua tudestga. Sia bilantscha da prestaziun, a la fin sco vicedirectura generala, è impressiunanta», di il CEO da Ringier Marc Walder.

Sut il presidi da Vincent Augustin vegn la suprastanza da la SRG.R a lantschar la tschertga d’ina nova directura u d’in nov directur. Ladina Heimgartner banduna RTR sin l’entschatta 2020.

RR novitads 11:00