Siglir tar il cuntegn

Header

In luf.
Legenda: Keystone
cuntegn

Monitoring animals da rapina Il triep da lufs dal Piz Bargias dat dapart

Il triep da lufs dal Piz Bargias u da Trin dat dapart, suenter ch'ils dus leaders dal triep èn crappads. Quai resulta dal rapport mensil davart animals da rapina gronds che l'Uffizi da chatscha e pestga ha publitgà.

Il bab dal triep dal Piz Bargias ha stuì vegnir sajettà l'entschatta da matg en la regiun da Val S. Pieder e la mamma è gia vegnida mazzada il schaner a Pigniu d'in u da plirs auters lufs.

Luf cun emettur da GPS è emigrà en Austria

En il rapport pon ins er leger d'in luf dal triep da Beverin ch'aveva survegnì la fin da mars in emettur da GPS. Quel saja emigrà via Livigno e Vnuost e sa chattia actualmain en il Pitztal en Austria.

Quest luf aveva survegnì in emettur d'ina vart per spaventar el, perquai ch'el era vegnì pliras giadas datiers da vitgs e da l'autra vart er per survegnir infurmaziuns da ses viadis. La registraziun dals lieus mussa en moda impressiunanta, tge distanzas che lufs pon far entaifer curt temp.

Stgarps d'animals da niz

Mez matg èn vegnidas stgarpadas 15 nursas d'in luf en Surselva. Tschintg dals animals stgarpads èn morts immediatamain, diesch ulteriurs han stuì vegnir mazzads pervia da las blessuras. Otg ulteriuras nursas èn vegnidas blessadas, han dentant survivì l'incident, e duas autras nursas èn svanidas dapi lura. La saira suandanta han ins pudì narcotisar e munir cun in emettur da GPS in luf al lieu, nua che las nursas èn vegnidas stgarpadas.

Tenor il rapport èn vegnids confermads l'onn 2021 enfin uss 17 animals da niz stgarpads da lufs, numnadamain 15 nursas e 2 chauras.

Charta cun inditgà ils 7 trieps da lufs en Grischun.
Legenda: RTR, grafica

Curta visita d'in urs en Grischun

Il cumenzament da matg ha l'Uffizi da chatscha e pestga plinavant survegnì differentas annunzias davart la preschientscha d'in urs brin en Grischun. Constatads èn vegnids mo ses fastizs. A maun da la successiun temporala da las annunzias è quest urs immigrà da l'Italia tras la Val Müstair en l'Engiadina ed ha probablamain puspè bandunà l'Engiadina suenter paucs dis en direcziun da l'Italia u da l'Austria.

Ord l'archiv:

video
Il luf è qua
Or da Cuntrasts dals 26.02.2019.
laschar ir

RTR novitads 06:00

Artitgels legids il pli savens

Scrollar a sanestra Scrollar a dretga