Cun il scumond da fieu absolut vul il chantun schanegiar ils pumpiers. Quai di l'Assicuranza d'edifizis dal Grischun envers RTR. Sch'i vess da dar in fieu, avessan ils pumpiers da vegnir ensemen e lura ir en acziun. Durant in'acziun saja dentant fitg stentus da realisar las mesiras da distanza ed igiena. Per evitar ch'ils pumpiers ston ir en acziun datti il scumond.
Grischun è unic chantun cun scumond absolut
Il Grischun è l'unic chantun cun scumond da far fieu absolut. Be en il Son Gagl vala in scumond da far fieu en il guaud. En ils auters chantuns na datti naginas prescripziuns.
Tenor l'Assicuranza d'edifizis resta il scumond absolut anc almain fin ils 20 da matg. Suenter vulan ins decider co vinavant. I saja dentant planisà da schluccar il scumond. Vegn anc tiers, ch'ins spetga ils proxim temp dapli plievgia.
