Siglir tar il cuntegn

Header

cuntegn

Nova ordinaziun da chatscha Per regenza grischuna è l'ordinaziun memia pauc rigurusa

Il Cussegl federal propona tranter auter da sbassar ils cunfins cura che chantuns pon sajettar in luf u regular in triep da lufs. Uss prenda la regenza dal Grischun posiziun. Els pretendan ina ordinaziun pli stricta.

Las propostas dal Cussegl federal en detagl

Avrir la boxSerrar la box

Il Cussegl federal propona, da sbassar ils cunfins cura che chantuns pon sajettar in luf u regular in triep da lufs.

Proposta per trieps da lufs e per singuls lufs

  • Nursas u chauras stgarpadas: enstagl da 15 duain da nov tanscher 10 animals stgarpads per pudair regular. Ils purs ston dentant gia avair prendì mesiras da protecziun raschunaivlas.
  • Tar gronds animals da niz (arment, chaval etc.): da nov duain tanscher 3 animals stgarpads.

Regiuns nua ch'i n'ha avant anc betg dà stgarps

  • La nova limita è tar 15 animals stgarpads aifer in mais (fin uss 25 animals) – u tar 25 animals stgarpads aifer quatter mais (fin uss 35 animals).
  • Qua duai er esser pussaivel da dumbrar animals da niz stgarpads che n'eran betg protegids.

Era dapli daners

Plinavant prevesa il Cussegl federal en l’ordinaziun revedida d’augmentar il sustegn federal per proteger muntaneras. La paletta da las mesiras duai vegnir schlargiada ed i duai dar dapli daners per ils chantuns per mesiras specificas.

Il punct central per la regenza chantunala, sajan ils purs e lur animals da niz. Il Cussegl federal propona, che diesch animals pitschens sco nursas che vegnan mazzadas duain bastar per pudair regular il luf. Fin uss eran quai 15. Tenor la regenza saja quai dentant anc adina memia blers animals.

Cun quellas mesiras na vegnin nus mai ad ina buna fin.
Autur: Mario CavigelliCusseglier guvernativ

In auter punct che disturba la regenza: Tar animals gronds – vatgas, vadels u chavals – propona il Cussegl federal trais stgarps per pudair regular il luf. Tenor Mario Cavigelli na basta quai: Els sa giavischassan in maximum dad in animal stgarpà, quasi sco «stritg cotschen».

Sajettar ils «schefs da trieps»

Plinavant giavischass la regenza chantunala ina pussaivladad da sajettar «lufs geniturs», che mussan in schlet cumportament. Uschia pudessan ins evitar ch'ils «schefs dals trieps» dattan vinavant lur cumportament sin ils auters lufs, manegia la regenza. Quai n'è actualmain betg lubì.

Che lur pretaisas sajan «sportivas», conceda er il president da la Regenza. Tuttina spera la regenza che lur opiniun vegnia resguardada dal Cussegl federal e possia vegnir realisada entaifer il rom da la lescha actuala.

Co vinavant?

La consultaziun da l’ordinaziun da chatscha revedida dura fin ils 5 da matg 2021. Suenter va il Cussegl federal anc ina giada sur l'ordinaziun or cun las propostas da tut ils chantuns e fa adattaziuns sin basa dals resuns . Pir lura van las nova ordinaziun en vigur.

RTR actualitad 17:00

Artitgels legids il pli savens

Scrollar a sanestra Scrollar a dretga