Il Grischun realiseschia quai che la Confederaziun ha fixà en sia ordinaziun – uschia la media chantunala Marina Jamnicki envers la Südostschweiz. En il Grischun saja la situaziun il mument stabila. Tenor il BAG hai dà las davosas emnas mo 17 cas per 100'000 abitants ed abitantas. I n'haja er betg pli dà erupziuns pli grondas dapi il champ da musica il fanadur.
Quai na munta dentant betg che mintga eveniment cun 1'000 persunas u dapli vegn lubì. Per pudair realisar talas occurrenzas dovri ina lubientscha da l'Uffizi da sanadad sut la cundiziun ch'il concept da protecziun persvada:
Per occurrenzas grondas vala l'obligatori da purtar mascras ed en bajetgs ston ils plazs esser numerads, per ch'ins sa tgi ch'è stà nua.
Sche tut ils visitaders portian ina mascra na stoppian ins betg ir en quarantina en cas che ina persuna infectada fiss stada en vischinanza, di Marina Jamnicki.
Tenor Jörg Schneider na saja il ristg ch'i dettia puspè dapli infecziuns da corona betg uschè grond. Ils organisaturs dals eveniments gronds sappian per tge ch'i va e lavurian professiunal. Occurrenzas pli pitschnas na sajan betg adina uschè conscient da la problematica.
Sch'i dess puspè erupziuns pli grondas pudess la situaziun vegnir evaluada danovamain e la lubientscha per eveniments gronds er puspè vegnir abolida.
