Ospital chantunal a Cuira - Il nov center da test è avert - Novitads

Ospital chantunal a Cuira Il nov center da test è avert

Per dar dumogn a la gronda dumonda da tests da corona, datti uss a Cuira sin l'areal da l'Ospital in nov center da test. I vala però er qua, ch'igl è da s'annunziar ordavant per telefon.

Autur: CDM / Lea Livers

Sin incumbensa dal chantun Grischun ha l'Ospital chantunal a Cuira avert il glindesdi il nov center da test. Il center sa chatta sin la plazza davant l'ospital en la via Loë. Tgi che vul sa laschar far in test sin Covid-19, sto dentant s’annunziar ordavant per telefon.

Il center da test n'è nagin center ch'ins po simplamain ir sperasvi. Ins sto s'annunziar avant che ir sur il numer da telefon

081 256 72 07

Il center da test è avert tranter las 08:00 e las 17:30. La hotline da corona (081 245 72 07) è cuntanschibla da las 08:00 fin las 20:00.

Via la hotline survegnan pazientas e pazients lura in termin. En il center vegnan be testadas persunas cun levs sintoms da corona. Tgi che ha sintoms grevs, survegn er vinavant in termin tar la staziun da scleriment en l'Ospital chantunal da Cuira. Er qua vala, ch'igl è sco emprim telefonar al numer inditgà sura.

Anc uss be tests da PCR

En in’emprima fasa stattan er en il nov center mo tests da PCR a disposiziun. En regla saja il resultat dal test enconuschent entaifer 24 uras. Quel vegnia lura communitgà a moda electronica via telefonin. Uschespert ch’ils uschenumnads «tests svelts» sajan segirs ed avant maun en ina quantitad suffizienta, vegnian era quels duvrads.