Siglir tar il cuntegn

Header

cuntegn

Ospital chantunal Chapitel da lavur curta plaunet a fin

Il mument fetschian radund 1'000 persunas lavur curta. En duas fin trais emnas saja tut il persunal puspè a la lavur, ha il directur da l'Ospital chantunal dal Grischun, Arnold Bachmann declerà. La raschun è che l’ospital po puspè far operaziuns betg urgentas a partir da glindesdi ils 27 d'avrigl.

video
Arnold Bachmann: «En duas fin trais emnas lavuran tuts puspè.»
Or da Telesguard dals 24.04.2020.
laschar ir

Manaschi dubel

La sfida saja da garantir in manaschi dubel. Per l’ina far dapli operaziuns usitadas e per l’autra restar pront da tractar pazients da corona, ha Bachmann declerà.

Sco emprim stoppian ins disponer da nov il persunal. Quai veglia per exempel dir ch'ins stoppia far novs plans da lavur, cunzunt per il manaschi d'operaziuns. Sco Bachmann declera dettia quai ina detga lavur. Dentant sajan tuts motivads. Cunzunt sajan tals collavuraturs ch'hajan stuì restar a chasa pervi da la lavur curta uss leds da puspè pudair vegnir a lavur.

Jau quint l'entschatta cun ina tscherta sceptica.
Autur: Arnold Bachmanndirectur Opsital chantunal dal Grischun

Il directur parta dal fatg ch'i dettia persunas ch'hajan resalvas dad ir en in ospital, pervi da la tema da s'infectar cun il coronavirus. Però saja el er bunamain led sche na tuts vegnian a medem temp. I dovria numnadamain in tschert temp enfin che tut giaja puspè tenor giavisch.

RTR novitads 20:00