Siglir tar il cuntegn

Header

Navigaziun

Legenda: Guardar il video L'ultima messa da Vitus Huonder sco uvestg da Cuira. Durada 03:12 minutas.
Or da Actualitad video dals 21.04.2019.
cuntegn

Chantun Pensà avevan tuts ch'i saja l'ultima...

En ina catedrala pulit plaina ha Vitus Huonder pudì celebrar la dumengia da Pasca. Quai da ses 77avel anniversari. La data ch'era previsa per el da demissiunar.

La dumengia da Pasca è la catedrala a Cuira stada bain emplenida. Tut ha pensà ch'i saja l'ultima messa da Vitus Huonder sco uvestg da Cuira. Avant dus onns aveva il papa numnadamain acceptà la demissiun da Huonder per ils 21-04-2019.

Vitus Huonder – 12 onns en uffizi

En la catedrala hai dà blers visitaders ch'han vulì festivar sia davosa messa en uffizi actual sco uvestg da Cuira. Vitus Huonder è stà fin uss 12 onns en uffizi sco uvestg da Cuira (2007 – 2019).

In act festiv cun blera musica

La festa ha entschet exact da las 10:00 cun il tschessar dals suns dals zains. Enturn 10 spirituals en vestgids nairs, alvs e colur d'aur entran la catedrala. Ils cartents stattan sin pais, cun gronds egls miran els sin l'uvestg da Cuira Vitus Huonder. El porta in vestgì dad aur, enta maun il fist e sin il chau la mitra. I'uvestg fa quai di in curt predi. Davart sia probablamain davosa messa, na perda el nagin pled – Forsa in segn, che ses uffizi na va anc betg a fin? El discurra da l'incendi en la Notre-Dame a Paris e davart il reginavel da Dieu.

Sa reflectescha nossa cuminanza catolica en il fieu da la catedrala da Notre-Dame? È quai in segn per in cristianissem brischà? D'in cristianissem ruinà?
Autur: Vitus Huonderuvestg da Cuira durant ses predi

Accumpagnada è la messa vegnida d'in chor. Ils suffragis u la communiun èn vegnidas fatgas a moda usitada. A la fin han ins anc engrazià a l'uvestg per sia lavur sacrala. Suenter la benedicziun ha il chor chantà in «Alleluia» durant che l'uvestg ha bandunà la catedrala. En il liber ha l'uvestg anc scurlà ina massa mauns e dà curtas baterladas. Cun las medias n'ha l'uvestg Vitus Huonder betg vulì discurrer. Vinavant èsi era vegnì scumandà da filmar en catedrala.

Vitus Huonder, in uvestg che resta en memoria

E ses uffizi fin ussa n'era la lavur da Vitus Huonder betg adina stada en ina buna glisch. Sias opiniuns conservativas encunter omosexuals, u la decisiun da viver suenter l'uffizi cun ils spirituals da l'urden ultra-conservativ dals paders da Pius, han savens purtà critica tar il pievel e las medias. Vitus Huonder è in uvestg che polarisescha fitg.

I resta in zichel omaduas varts. Ins duess tegnair il bun ed era il main bun e forsa per il proxim uvestg mirar tge ch'el po far meglier.
Autur: Robin MittnerVisitader a la messa da Vitus Huonder

Far endretg a mintgin è ina vart, dentant manar in servetsch divin in'autra. Tar tut las persunas dumandadas han ins sentì grond plaschair. Ins ha er apprezià che bler è stà en latin.

A mai hai plaschì fitg (...) surtut perquai che tut è stà en latin.
Autur: Claudia CastelazziVisitader a la messa da Vitus Huonder

RR novitads 14:00