Siglir tar il cuntegn

Header

Trais persunas en ina chombra dal center d'asil Laax.
Legenda: Distanza e protecziun è er impurtant en center d'asil dal Grischun. Keystone
cuntegn

Per proteger requirents d'asil Chantun avra ulteriurs alloschis d'asil

Il Grischun metta en funcziun ulteriurs alloschis d'asil, quai cun il sustegn da la Protecziun civila. Uschia pon las prescripziuns pervia dal coronavirus vegnir tegnidas en. Uschia scriva il Departament chantunal da giustia, segirezza e sanadad.

Il Grischun dat actualmain suttetg a 480 persunas en 10 centers d'asil. L'occupaziun saja tar 55% (dals totalmain 853 plazs disponibels). Per ademplir las mesiras da la Confederaziun pertutgant distanza ed igiena vegnian ins tant pli spert a far adattaziuns, uschia scriva l'Uffizi da migraziun. Dasper mesiras da construcziun e d'organisaziun dettia tranter auter in scumond da visita per terzs. Plinavant na datti nagins tranfers tranter ils centers. Quai per proteger requirentas e requirents d'asil ma er il persunal en ils alloschis.

Dapli plaz a Mustér, Cuira e Spleia

Per proteger uschè bain sco pussaivel ils abitants e collavuraturs ha il chantun avert ils 25 da mars l'immobiglia da reserva a Mustér. Ultra da quai duain er ils alloschis a Cuira e Spleia vegnir reaverts. Per garantir quels manaschis ha l'Uffizi da migraziun sustegn da la Protecziun civila. Quels gidanters surprendian cunzunt las controllas d'access u er incumbensas d'assistenza.

Preparads per cas da corona

Er sch'i vess da dar cas da corona u suspects d'infecziun sajan ils alloschis preparads. Chombras d'isolaziun sajan endrizzadas. Co proceder en cas d'ina infecziun saja coordinà stretgamain cun la media chantunala. Per il mument na dettia dentant nagins cas da suspect u infecziun en centers d'asil en il chantun Grischun.

Ord l'archiv

Il 2015 han ils Cuntrasts illustrà la vita en in center per requirents d'asil, il film mussa ils novs vischins da Laax.

RTR novitads 10:00