Domat, Favugn/Tamins, Trin/Flem, Partenz e Mantogna/Tumleastga: En quels lieus na datti quest onn nagin pass da vacanzas da ProJunior (l'anteriura Pro Juventute Grischun). Per l'ina hajan ins respect, ch'i dettia infecziuns, malgrà mesiras da protecziun. Motiv principal saja dentant surtut l'organisaziun: Dumandar manadras da curs, scriver ora quels, far glistas cun participants. En tut il chantun vegnian qua ensemen pliras 100 uras da lavur voluntaria.
Nus avain gia la fin dal schaner stuì decider, sche nus vulain realisar il pass da vacanzas u betg. La situaziun è là stada fitg malsegira.
Organisar curs a curta vista na saja betg stà pussibel cun lur meds. Nagin pass da vacanzas vul er dir, ch'ils uffants na survegnan nagin bigliet da tren e bus per tut il chantun durant las vacanzas. Nagins curs, nagin bigliet: Uschia saja la cunvegna tranter ProJunior, la Viafier retica ed AutoDaPosta.
Purschida pli pitschna
Avant in onn era la situaziun anc pli precara. Ils curs hai mo dà en singuls lieus. Il president da ProJunior Grischun, Sandro-Simon Caviezel, sa legra ch'i guarda or auter quest onn. En blers lieus datti il pass da vacanzas, dentant cun pli paucas purschidas, di el envers RTR.
Bleras firmas na vulan anc betg persunas estras en lur localitads. Plinavant datti bleras manadras e manaders da curs che tutgan tar la gruppa da ristg.
Sur tut il chantun dettia tranter 10 e 20% damain curs – cun grondas differenzas localas. Tar mintga curs valan las prescripziuns enconuschentas: Lavar ils mauns, uffants sur 12 ston purtar mascrina e contact-tracing.
Sandro-Simon Caviezel quinta dentant cun bleras annunzias. L'onn 2020 hajan els gì excepziunalmain bleras annunzias – simplamain perquai ch'igl n'ha dà nagina autra purschida suenter l'emprim lockdown. El spera dentant surtut, che quest onn saja il davos onn sut circumstanzas spezialas.
