Il pass da vacanzas è ina purschida la Pro Juventute, quai tant en la Cadi sco era en la Val Müstair. Ed en omaduas regiuns vegn el sulet purschì mintga dus onns. Ma quest onn datti sulet en la Cadi la purschida ed en la Val Müstair betg.
Blers uffants restan en Svizra ed en la regiun
Per ina da las organisaturas dal pass da vacanzas en la Cadi, Manuela Venzin, èsi stà cler ch’igl è necessari da porscher era quest onn, u surtut quest onn il pass da vacanzas. Blers uffants restian en Svizra e na possian betg ir en vacanzas e perquai saja necessari da porscher il pass da vacanzas.
Quai mussian era las annunzias, uschia sajan entaifer curt temp e senza far reclama vegnidas fitg bleras annunzias, di Manuela Venzin. Ella è persvasa che las reglas e las prescripziuns possian vegnir resguardadas. Ma purschidas sco star sur notg en biblioteca u era la disco d’uffants, lezzas purschidas hajan ins stuì prender ord il program. Autras occurenzas vegnan purschidas en pli pitschnas gruppas, ma tut en tut possian els quasi porscher tut sco ils ultims onns.
Blera lavur organisatorica en memia curt temp
En la Val Müstair na porscha la Pro Juventute betg il pass da vacanzas quest onn. Il motiv principal saja che quai avessi muntà fitg blera lavur entaifer fitg curt temp e quai n’hajan ellas betg pudì prestar, di Sandra Falett.
Ma en Val Müstair dettia quai purschidas da ballape e dad ir cun velo, che vegnian tuttina purschidas era senza pass da vacanzas ed era la biosfera porschia insatge per ils uffants. Quai saja stà fitg impurtant che quai gira insatge en Val ed il pass da vacanzas vegnia alura puspè actual cura che tut quest travasch cun il coronavirus saja passà, di Sandra Falett.
