Pervi d'in defect tecnic èn idas a perder tar il chantun Grischun trais dumondas d'agid per cas da direzza. Sco quai ch'il chantun communitgescha haja dà l'emna passada in defect cun chargiar la dumonda a moda directa sur la pagina. I na saja betg enconuschent, tgeninas trais interpresas che sajan pertutgadas. Il chantun enconuschia sulet il temp cura che la dumonda saja vegnida inoltrada.
I sa tracta da las inoltraziuns ch'èn vegnidas fatgas:
- gievgia, ils 4 da favrer a las 12:04
- gievgia, ils 4 da favrer a las 17:59
- venderdi ils 5 da favrer a las 12:14
Il Departament d'economia publica e fatgs socials supplitgescha las trais interpresas che han chargià si lur dumondas durant ils termins exacts surnumnads da s'annunziar per e-mail tar haertefall@gr.ch.
Per entant saja la funcziun da chargiar si direct las dumondas per agid en cas da direzza ord funcziun, scriva il chantun. Las dumondas possian vegnir inoltradas vinavant per posta u per e-mail ubain possia vegnir spetgà, fin che l'upload funcziunia puspè.