Siglir tar il cuntegn

Header

audio
Pandemia ed atun – Co resentan las clinicas quai?
Or da Actualitad dals 13.11.2020.
laschar ir. Durada: 03:38 minutas.
cuntegn

Praticas psichiatricas Letgs plains, massa novs pazients ed ina lunga glista da spetga

Bleras clinicas e praticas per persunas cun problems psichics en il Grischun han ils mauns plain da far. Ellas n'èn anc betg al limit ma occupadas fitg. Quai din differents psichiaters e psichiatras.

La dumonda per agid saja mumentan gronda, di la psicoterapeuta Emerita Rusca. Ella ha ina pratica per giuvenils e creschids a Cuira ed è en la suprastanza da l’Associaziun grischuna per psicoterapia.

Dapi la stad sent jau ina pli gronda dumonda per agid psicologic. Ins sto dentant dir, che nus avain l’atun ed enviern adina dapli dumondas – ma uss è la dumonda schon bler pli gronda pervia da corona.
Autur: Emerita Ruscasuprastanta da l'Associaziun grischuna per psicoterapia

Il medem senta era il Servetsch psichiatric dal Grischun. Sco ch'il medi directur da la psichiatria per creschids, Andres Schneeberger, di, sajan uss tant las clinicas staziunaras, sco er las clinicas ambulantas en las regiuns ferm occupadas.

En cumparegliaziun cun l’onn passà è la fluctuaziun pli auta. Dapli pazients vegnan, ma dapli vegnan lura er puspè relaschads.
Autur: Andres Schneebergermedi directur da la psichiatria per creschids dils Servetschs psichiatrics dil Grischun

Las clinicas e praticas na sajan betg anc al limit, din Andres Schneeberger ed Emerita Rusca. In zichel capacitad hajan blers anc, dentant betg bler.

Quatter gruppas da pazients

Andres Schneeberger di, ch’ils problems psichics dils pazients sajan sumegliants sco fin uss. El numna tranter auter depressiuns, disturbis da tema e disturbis da persunalitad. Ina chaussa dettia dentant en egl: Ils pazients sajan pli agressivs.

Quai constatescha er Emerita Rusca. Tenor ella datti quatter gruppas da pazients: Quels che vegnian pli agressivs, quels che hajan dapli tema, che survegnan depressiuns u quels che na pon betg pli. Tar la davosa gruppa tutga surtut il persunal da sanadad.

Dapli giuvens

Insatge auter che dettia en egl è, che dapli giuvens tranter 18 e 25 onns dumondan per agid, di ella. Betg pudair ir en sortida e s’entupar cun amis saja ina gronda restricziun per ils giuvens. Vinavant portia la situaziun actuala gronda malsegirezza ed uschia hajan blers pazients giuvens tema per l’avegnir.

RTR actualitad 07:00

Artitgels legids il pli savens

Scrollar a sanestra Scrollar a dretga