Las premissas per tegnair avert ils territoris da skis èn vinavant ademplidas. Quai ha communitgà la regenza grischuna. Perquai ha ella prolungà la lubientscha per ils territoris da skis enfin la fin da favrer. La vasta strategia da tests da corona haja sustegnì questa decisiun – ha argumentà la regenza.
Las experientschas da las ultimas emnas hajan mussà, ch’i saja per gronda part pussaivel d’evitar fullas da glieud en ils territoris da skis.
La regenza grischuna giuditgeschia cuntinuadamain il svilup. En cas che la situaziun epidemiologica sa midass, pudess la lubientscha vegnir retratga dals manaschis da sport d'enviern.
