A partir dad immediat vala in scumond dad ir a chatscha cun ballas da plum en il chantun – i dat dentant ina fasa transitorica fin il prim da settember 2021. Quai ha l’uffizi da chatscha era communitgà la mesemna.
L’analisa ch’il chantun ha laschà far en connex cun la muniziun haja mussà, ch’ina maioritad dals chatschaders dovra gia muniziun senza plum. Plinavant na dettia era strusch differenzas tranter ils materials quai che pertutgia la protecziun e la segirezza.
Dapli squitsch sin selvaschina d’ungla en il guaud
En territoris nua ch'il conflict tranter guaud e selvaschina è grond, vul il chantun reducir vinavant il dumber da tschiervs e chavriels. Il plan saja da sajettar animals feminins, scriva l'Uffizi da chatscha. Ed en tscherts guauds veglian els era regular pli ferm il dumber da chamutschs.
Per la chatsch'auta da quest onn cuntinuescha il chantun plinavant d'avrir cumplet u parzial differents asils. Quai sco mesira supplementara per augmentar la preda.
