Siglir tar il cuntegn

Header

cuntegn

Project Lai Baical Tratg ad uras il frain d'urgenza e smess

Il nudader Ernst Bromeis ha stuì interrumper sia expediziun en il Lai Baical. Problems cun la sanadad han sfurzà el da dar si. Dentant è l'ambassadur da l'aua enavos en il Grischun.

Ernst Bromeis vuleva nudar ils 800 kilometers tras il Lai Baical en Sibiria. Cun questa expediziun ina giada dapli far attent sin la preciusadad da noss'aua. Suenter 10 dis nudar ha l'ambassadur da l'aua survegnì problems cun irregularitads dal cor. Suenter ch'el era nudar 60 kilometers ha el stuì interrumper sia expediziun.

audio
Expediziun al Lai Baical – Ernst Bromeis davart la fin andetga
ord Sportissimo dals 28.07.2019.
laschar ir. Durada: 5 minutas 14 Secundas.

Enavos en Svizra vegn uss fatg tests cun ses cor per eruir tge che n'è betg en urden. El saja led d'avair interrut ad uras l'experiment ed evità ina catastrofa. D'in naufragi na vul l'Engiadinais dentant betg discurrer. Tar ina expediziun na sappian ins mai tge fin ch'ella vegni a prender.

Igl è stà in privilegi

Cun nudar en quest lai infinit en la cuntrada selvadia da la Sibiria, senza nagut sin l'aua, be el ed il Lai Baical, quai saja stà ses desideri dapi onns. Tut quai ch'el ha superà – ses temp en Sibiria restia per adina.

Sch'el turna in bel di en l'aua dal Baical na sa Ernst Bromeis betg. El na sa era betg sch'igl è insumma pussaivel da nudar questa immensa distanza tras il lai uschia sco el ha vulì.

Per discurrer da sbagls ubain tge ch'el e sia equipa avessan pudì far auter, saja uss anc memia baud. Els sajan uss anc en la fasa da lavurar si tut. Ils patratgs sajan il mument anc adina stedi en Sibiria e tar il Lai Baical.

RR Sportissimo 17:00

Artitgels legids il pli savens