Ernst Bromeis oriund dad Ardez en l’Engiadina Bassa va cun grond respect en questa expediziun. Quai na saja betg da cumparegliar cun tut quai ch’el haja fatg fin ussa, di Bromeis en il rom dal Miracul Blau. Bromeis vegn accumpagnà durant quest temp en la Sibiria d'in pitschen team. En l’aua è el dentant sulet. El noda senza accumpagnament d’ina bartga.
Ina dimensiun gigantica
Il Lai Baical en Russia sa chatta en las muntognas dal sid da la Sibiria. Il Lai è cun 1'642 meters il pli profund lai dal mund. La lunghezza da la riva munta a 2’125 kilometers. Enturn il Lai Baical regia in clima relativ miaivel cun guaud da dascharina, dentant cun fitg pauca civilisaziun. Durant ils mais d’enviern (november fin mars) èsi fitg fraid cun temperaturas enturn minus 20 grads, uschia ch’era il lai è schelà durant quest temp. Il Lai Baical è il pli grond reservuar d’aua dultscha – quai cun 20% da tut l’aua dultscha da quest mund.
Il Lai Baical è il lai da simbol per il Miracul Blau, il simbol per l’aua dultscha.
In respect immens
Il pli grond respect da questa expediziun haja el ch’el e sia pitschna squadra perdian propi il fund sut ils pes, che quest’aua e quai esser sulet en questa natira saja ina memia gronda sfida e ch’els na sappian co ir enturn cun tut quai, di Ernst Bromeis. Betg sulet il Lai Baical è d’ina autra dimensiun ch’ils lais che Bromeis enconuscha da la Svizra, er la cultura ed il viver en questa regiun è tut in auter mund. Duas giadas ha Ernst Bromeis visità ils davos mais il Lai Baical en il nord da la Mongolia per survegnir emprimas impressiuns da quai che spetga el questa stad.
Il Lai Baical è per mai la sfida ultimativa en quest decenni da nudar cun mes projects dal Miracul Blau.
Quants kilometers a di che Ernst Bromeis vul nudar tras il Lai Baical na po el betg dir. Quai dependa tut da las relaziuns da l’aura. L’idea saja da nudar oravant tut l’avantmezdi, quai cun in neopren ed uregliers da nudar tut normal, senza in equipament tecnologic stravagà. La probabilitad ch’el vegnia da nudar sur l’entira distanza dad 800 kilometers saja minimala, perquai stuessi constar propi tut ed i duvrass er blera fortuna. I saja da prender di per di ed ir e viver cun la natira e betg encunter la natira.
Ernst Bromeis – l'ambassadur da l'aua
Ernst Bromeis s’engascha dapi la fin dal 2007 per l’aua. Avant passa 10 onns ha el fundà «Il Miracul Blau». Ses emprim project ha el realisà il 2008 cun nudar tras 200 lais dal chantun Grischun. Dus onns pli tard è el nudà tras ils pli gronds lais da la Svizra. L’emprima emprova da nudar tras il Rain il 2012 n’è betg gartegiada. Bromeis ha stuì interrumper questa expediziun pervia da problems da sanadad. Dus onns pli tard, il 2014, è l’expediziun «Rain» gartegiada. El è nudà da la tgina dal Rain al Lai da Tuma fin a Rotterdam en l’Ollanda.
RR Sportissimo 17:00/actualitad 07:00