Oz, mesemna, ha il Cussegl federal infurmà che occurrenzas cun passa 1'000 persunas sajan puspè lubidas a partir dal prim d'october. Divers chantuns avevan pretendì ch'il scumond per occurrenzas grondas restia anc enfin la fin da l'onn. Er il chantun Grischun avess preferì in scumond pli lung.
Cunquai ch'il chantun Grischun saja dentant in chantun cun bleras occurrenzas sportivas sco er culturalas, vesa il directur da sanadad dal Grischun, Peter Peyer, dentant er la vart positiva da questa decisiun. I saja uschia pussaivel dapli che fin uss, ha ditg Peyer a RTR. Il medem mument ha el dentant er avertì che la situaziun saja uss anc adina critica.
La sfida da chattar ils dretgs criteris
Perquai saja uss impurtant che chantuns e Confederaziun chattian ina buna basa per las pretensiuns als organisaturs. Tge criteris ch'il chantun Grischun giavischass n'ha il minister da sanadad anc betg pudì dir.
Cler èsi dentant che las premissas duain valair per tut las spartas sco sport, cultura u religiun. Uschia duai dar ina saiv directiva dasper las mesiras da basa sco il tegnair distanza e l'igiena. Tut tenor il svilup da la situaziun epidemiologica e las capacitads dal contact tracing vegnia il chantun dentant a refusar u lura a dar la lubientscha.
Situaziun stabila en Grischun
En il chantun saja la situaziun il mument stabila cun 16 persunas en isolaziun e 57 en quarantina. En l'entira Sviza percunter sajan las cifras puspè creschidas fermamain. Perquai valia vinavant da far gronda attenziun en connex cun grondas gruppas da persunas.
