«Quai èn las schluccadas che nus avain giavischà», di Marcus Caduff, minister da finanzas dal Grischun. Per las ustarias restia quai dentant vinavant pretensius, sch’ellas dastgian avrir be las terrassas. Impurtant saja perquai ch’ins possia vinavant sustegnair la gastronomia cun daners per cas da direzza.
Tge che fetschia surstar saja, ch’il Cussegl federal lubeschia era occurrenzas endadens, nua ch’il ristg d’infecziun saja pli aut. Là saja da tegnair quint a las mesiras da protecziun cun purtar mascrina e tegnair la distanza per che las cifras d’infecziun na giajan betg ad aut.
Fitg bun saja che las activitads en il liber – tant da sport sco er da cultura – sajan puspè lubidas. «Per la morala e per la psica è quai impurtant», di Marcus Caduff, cusseglier guvernativ.
Levgiament tar la gastronomia
La decisiun d'almain puspè avrir las terrassas saja in levgiament per la branscha, di Franz Sepp Caluori, il president da GastroGrischun.
Finalmain in pass en la dretga direcziun, jau sun fitg cuntent.
Il proxim pass stoppia esser dad avrir er endadens. Mo fin tar quel pass cuzzia quai anc in zic. Avrir las terrassas saja dentant in emprim pass, natiralmain betg per tuts. Quels che n'hajan nagina terrassa, sajan vinavant dependents dal sustegn dal chantun e da la Confederaziun. Ma quai funcziunia dètg bain ed er quels che possian avrir uss almain ina part da lur manaschi, survegnian vinavant daners dal chantun.
El sez na fetschia era betg quittads, ch'ins stoppia puspè serrar las terrassas sche la situaziun sa pegiureschia puspè. L'enviern hajan ils restaurants en ils territoris da skis mussà, ch'ils concepts da protecziun funcziunian. Uss spera Caluori sulettamain che l'aura na fetschia betg in stritg atras il quint da l'avertura.
Las partidas èn divididas
Las reacziuns da las partidas politicas sin las schluccadas dal Cussegl federal èn divididas. Per la PPS van ellas memia plaun, per la PLD èn ellas raschunaivlas e per l'Allianza dal Center ina consequenza da mesiras gartegiadas. La PS ed ils Verds pretendan, ch'ils programs da sustegn cuntinueschian. Per ils Verds percunter n’èn las schluccadas betg responsablas en vista a las infecziuns creschentas.
Tuttas partidas èn dentant perina, ch'ins stoppia far pli vinavant cun vaccinar. Per la PS è il Cussegl federal en ina situaziun critica.
